އަމީނީ މަގު މަރާމާތުކުރުމުގެ މަޝަރޫއުގެ ދަށުން ސެގްމެންޓް 3 ގެ މަސައްކަތް ނިމުމަކާ ގާތަށް

އަމީނީ މަގު މަރާމާތު ކުރުމަށް ކުރިއަށްގެންދާ ބޮޑު މަޝްރޫޢުގެ ދަށުން، ތިންވަނަ ސެގްމަންޓުގެ މަސައްކަތްތައް ނިމުމަކާ ގާތްވެފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ. އަމީނީ މަގުގައި ހަލާކުވެފައިވާ ސަރަހައްދުތައް ޒަމާނީ ފެންވަރަށް ރަނގަޅުކުރުމަށްޓަކައި ކުރިއަށްގެންދާ މި މަޝްރޫއުގެ ސެގްމަންޓް 3 ގެ މަސައްކަތްތައް އެމްޓީސީސީން ފަށާފައިވަނީ މި އޮކްޓޫބަރު މަހުގެ 4 ވަނަ ދުވަހުއެވެ. މި ސެގްމަންޓުގައި ހިމެނެނީ އިއްޒުއްދީން މަގާ ހަމައިން ފެށިގެން ކޯރުކެނޑި ހިނގުމާ ހަމައަށް އޮންނަ ސަރަހައްދެވެ.

މި ސެގްމަންޓުގެ މަސައްކަތްތަކުގެ ތަފްސީލު ދެއްވަމުން އެމްޓީސީސީން ބުނީ، ކުރިން އަޅާފައިވާ ތާރުގެ ތެރެއިން 1924.77 އަކަމީޓަރުގެ ސަރަހައްދެއްގެ ތާރު ނެގުމަށްފަހު، އަލުން އޭބީސީ ފަށަލަ އަޅައި، ތާރު އެޅުމުގެ މަސައްކަތް ކާމިޔާބުކަމާއެކު ކުރިއަށް ގެންދެވުނު ކަމުގައިއެވެ. އަދި މިހާރު ކުރިއަށްދަނީ މަގުމަތީގެ ނިޝާންތައް ކުރެހުމުގެ މަސައްކަތުގެ އެންމެ ފަހުގެ މަރުހަލާގެ މަސައްކަތްތަކެވެ. މީގެއިތުރުން، މަގުގެ ޖަންކްޝަންތަކުގައި ކޮންކްރީޓް އެޅުމުގެ މަސައްކަތްތައްވެސް ނިމުމަކާ ގާތްވެފައިވާއިރު، ސެގްމަންޓް 3 އާންމުންނަށް ހުޅުވާލުމުގެ އެންމެ ފަހުގެ ތައްޔާރީތައް އަންނަނީ ވަމުންނެވެ.

މި މަޝްރޫއުގެ ދަށުން ކުރިން ކުރެވުނު މަސައްކަތްތަކަށް ބަލާއިރު، ސެގްމަންޓް 1 އަދި ސެގްމަންޓް 2 ގެ މަސައްކަތްތައް އެއްކޮށް ނިންމައި ވަނީ އާންމުންނަށް ހުޅުވާލާފައެވެ. އެއީ ދިވެހިރާއްޖޭގެ އަޑުން ފެށިގެން ދަރުމަވަންތަ ހޮސްޕިޓަލާ ހަމައަށް އޮތް ސަރަހައްދުގެ އިތުރުން، ދިވެހިރާއްޖޭގެ އަޑު ކުރިމަތިން އޮންނަ ހަތަރުއަނގޮޅި ކަންމައްޗެވެ. މި ދެ ސެގްމަންޓުގެ މަސައްކަތް ނިމި ބޭނުންކުރަން ފެށުމާއެކު އެ ސަރަހައްދުގެ ދަތުރުފަތުރަށް ބޮޑު ލުޔެއް ލިބިގެންދިޔައެވެ.

ކުރިއަށް ހުރި މަސައްކަތްތަކަށް ބަލާއިރު، ތިންވަނަ ސެގްމަންޓުގެ މަސައްކަތް ނިމި އާންމުންނަށް ހުޅުވާލުމާއެކު، ސެގްމަންޓް 4 ގެ މަސައްކަތް ފެށުމަށް ވަނީ ތައްޔާރުވެފައެވެ. ސެގްމަންޓް 4 ގެ ތެރޭގައި ހިމެނެނީ ކޯރުކެނޑި ހިނގުމުން ފެށިގެން ގިޔާސުއްދީން އިންޓަރނޭޝަނަލް ސްކޫލާ ހަމައަށް އޮންނަ ސަރަހައްދެވެ. މި ސެގްމަންޓުގެ މަސައްކަތްވެސް ތާވަލާ އެއްގޮތަށް ކުރިއަށް ގެންދިއުމަށް އެމްޓީސީސީން ރާވާފައިވެއެވެ.

އަމީނީ މަގުގެ އިންފްރާސްޓްރަކްޗަރ މުޅިން ނިމި، މުޅި މަގު ޒަމާނީ ފެންވަރަށް ތަރައްގީކޮށް ނިމުމުން، މާލޭގައި ދިރިއުޅޭ ރައްޔިތުންނަށާއި މަގު ބޭނުންކުރާ ފަރާތްތަކަށް ދަތުރުފަތުރު ކުރުމުގައި ބޮޑެތި ލުއިފަސޭހަތަކެއް ލިބިގެންދާނެ ކަމަށް އެމްޓީސީސީން ފާހަގަކުރެއެވެ. މި މަޝްރޫއަކީ މާލޭގެ މަގުތަކުގެ ފެންވަރު ރަނގަޅުކުރުމަށް ހިންގޭ މުހިންމު މަޝްރޫއެކެވެ.