ޕީއެމްއައި މެލޭޝިއާގެ ފަރާތުން އިންތިޒާމުކޮށްގެން، މި އޮކްޓޫބަރު މަހުގެ 12 އިން 13 އަށް ކުއާލަ ލަމްޕޫރުގައި ބޭއްވި "ޕްރިޒަމް އެންޑް އިގްނައިޓް 2026" ކޮންފަރެންސްގައި އެމްޓީސީސީގެ ޗެއާޕާސަން އަލްފާޟިލާ ސާދާ އިބްރާހީމް އިސްވެ ހުންނަވައިގެން، އެ ކުންފުނީގެ މަތީ ފަންތީގެ ވަފުދަކުން ބައިވެރިވެވަޑައިގެންފިއެވެ.
މި ވަފުދުގައި ޗެއާޕާސަންގެ އިތުރުން، ސީނިއާ ޖެނެރަލް މެނޭޖަރު އަލްފާޟިލް އުމަރު ޒާހިރާއި، ޖެނެރަލް މެނޭޖަރު އަލްފާޟިލް އިބްރާހީމް ޙަސަން އަދި ކޮންސްޓްރަކްޝަން އެންޑް ޑްރެޖިންގ ޑިވިޜަން (ސީޑީޑީ) ގެ ޒޯން މެނޭޖަރުން ބައިވެރިވެވަޑައިގެންނެވިއެވެ.
"ޕްރޮޖެކްޓް މެނޭޖަރޭސް އޯކެސްޓްރޭޓަރ: ދަ ގާޑިއަން އޮފް ޕްރޮޖެކްޓް ވެލިއު" މި ޝިއާރުގެ ދަށުން ކުރިއަށް ގެންދިޔަ މި ކޮންފަރެންސަކީ ޕްރޮޖެކްޓް މެނޭޖްމަންޓް ދާއިރާގެ މާހިރުންނާއި، ސިނާޢީ އިސްވެރިން އަދި އީޖާދީ ފަރާތްތައް އެއްތަންވެ، މުހިންމު މަޝްވަރާތަކެއް ކުރިއަށް ގެންދިޔަ ބައްދަލުވުމެކެވެ. މިގޮތުން، ހަރުދަނާ ޕްރޮޖެކްޓް ލީޑަރޝިޕާއި، ޑިޖިޓަލް ޓްރާންސްފޯމޭޝަން، ދެމެހެއްޓެނިވި ތަރައްޤީ، ސްޓްރެޓީޖިކް ގުޅުންތައް ބަދަހިކުރުން އަދި އަގުހުރި ނަތީޖާ ހާސިލުކުރެވޭނެ ފަދަ ނިންމުންތައް ނިންމުމާ ގުޅޭގޮތުން ފުޅާ ދާއިރާއެއްގައި ހިޔާލު ބަދަލުކުރެވުނެވެ.
Advertisement
މި ކޮންފަރެންސްގެ ސަބަބުން، ޕްރޮޖެކްޓް ގަވަރނަންސް ހަރުދަނާކުރުމަށާއި، އޮޕަރޭޝަނަލް ކޯޑިނޭޝަން ރަނގަޅުކުރުމުގެ އިތުރުން މަޝްރޫޢުތައް އެންމެ ފުރިހަމައަށް ނިންމުމަށް ބޭނުންވާ މުހިންމު މަޢުލޫމާތުތަކާއި ތަޖުރިބާތައް އެމްޓީސީސީގެ ޓީމަށް ވަނީ ލިބިފައެވެ. އަދި މިއީ ކުންފުނިން ހިންގާ މަޝްރޫޢުތަކުގެ ފެންވަރު މަތިކޮށް، ދެމެހެއްޓެނިވި އަގުތަކެއް އުފެއްދުމަށް އެމްޓީސީސީން ކުރަމުންދާ މަސައްކަތްތަކަށް ލިބުނު އިތުރު ބާރެކެވެ.
