ށ. ނަރުދޫ ސިއްޙީ މަރުކަޒުގައި ލެބޯޓަރީގެ ޚިދުމަތް ރަސްމީކޮށް ފަށައިފިއެވެ. އެ ރަށުގައި ބޭއްވި ޚާއްޞަ ރަސްމިއްޔާތެއްގައި މި ހިދުމަތް އިފްތިތާހުކޮށްދެއްވީ މިނިސްޓަރ އޮފް ހެލްތު ގީލާ އަލީ އެވެ. މި ރަސްމިއްޔާތުގައި މިނިސްޓްރީގެ އިސްބޭފުޅުންނާއި، ނަރުދޫ ކައުންސިލްގެ އިތުރުން ސިއްހީ މަރުކަޒުގެ މުވައްޒަފުން ބައިވެރިވެވަޑައިގެންނެވިއެވެ. ހިދުމަތް ފައްޓަވައިދެއްވުމަށްފަހު މިނިސްޓަރު ވަނީ ލެބޯޓަރީ ބައްލަވާލައްވައި، މުވައްޒަފުންނާ ބައްދަލުކުރައްވާފައެވެ.
ރާއްޖޭގައި މީހުން ދިރިއުޅޭ ހުރިހާ ރަށެއްގައި ލެބޯޓަރީގެ ޚިދުމަތް ޤާއިމުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވަޢުދުފުޅެކެވެ. އެގޮތުން، މި ހިދުމަތް ނެތް 76 ރަށެއްގައި ލެބޯޓަރީ ގާއިމުކުރުމުގެ މަސައްކަތް ސަރުކާރުން ބާރަށް ކުރިއަށްގެންދާއިރު، ނަރުދޫގައި މި ހުޅުވުނު ލެބޯޓަރީއަކީ މި ސަރުކާރުން އަތޮޅުތަކުގައި ޤާއިމުކޮށްދިން 21 ވަނަ ލެބޯޓަރީއެވެ.
ނަރުދޫއަކީ އާބާދީގެ ގޮތުން ކުޑަ ރަށަކަށް ވުމާއެކު، މީގެ ކުރިން އާދައިގެ ޓެސްޓެއް ހަދާލުމަށްވެސް އެހެން ރަށަކަށް ދަތުރުކުރަންޖެހުމަކީ އެ ރަށުގެ ރައްޔިތުންނަށް އުފުލަންޖެހުނު ބޮޑު ތަކުލީފެކެވެ. ނަމަވެސް، ސިއްޙީ މަރުކަޒުގައި މި ހިދުމަތް ފެށުމާއެކު، ރަށުގައި ތިބެގެން ފަސޭހަކަމާއެކު ލޭގެ ޓެސްޓުތަކާއި އެހެނިހެން ތަޙުލީލުތައް ހެދުމުގެ މަގު މިހާރު ވަނީ ތަނަވަސްވެފައެވެ.
