ކުޑަކުދިންނަށް ކުރާ އެކި ބާވަތުގެ އަނިޔާތައް ހުއްޓުވުމަށާއި، އެކުދިންގެ ހައްގުތައް ރައްކާތެރިކުރުމުގެ ނިޒާމު ވަރުގަދަކޮށް، އަނިޔާގެ މައްސަލަތަކަށް އިޖާބަދިނުމުގެ ގައުމީ އަދި ބައިނަލްއަގުވާމީ މަސައްކަތްތައް ހަރުދަނާކުރުމަށް އެކުލަވާލާފައިވާ "ބޮގޯޓާ ކޯލް ޓު އެކްޝަން" ގަރާރުގައި ދިވެހިރާއްޖެއިން މިއަދު ސޮއިކޮށްފިއެވެ.
މިއަދު މިކަމަށްޓަކައި ބޭއްވި ހާއްސަ ރަސްމިއްޔާތުގައި ދިވެހި ސަރުކާރުގެ ފަރާތުން މި ގަރާރުގައި ސޮއިކުރެއްވީ ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވުޒާރާއިން ޑރ. ގީލާ އަލީއެވެ. މި ގަރާރަކީ 2024 ވަނަ އަހަރުގެ ނޮވެންބަރު މަހު ކޮލަމްބިއާގެ ބޮގޮޓާގައި ބޭއްވި، ކުޑަކުދިންނަށް ކުރާ އަނިޔާ ހުއްޓުވުމާ ބެހޭ ފުރަތަމަ ބައިނަލްއަގުވާމީ މަހާސިންތާގައި ބައިވެރިވި ގައުމުތަކުން އިސްނަގައިގެން އެކުލަވާލައި އިފުތިތާހުކުރި މުހިންމު ގަރާރެކެވެ.
ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވުޒާރާއިން ހާމަކުރި ގޮތުގައި، މި ގަރާރުގެ މައިގަނޑު މަގުސަދަކީ ކުޑަކުދިން ރައްކާތެރިކުރުމަށްޓަކައި ހޯދުންތަކާއި ސައިންޓިފިކް ހެކިތަކުގެ މައްޗަށް ބިނާކޮށް ފިޔަވަޅުތައް އެޅުމެވެ. އަދި ގާނޫނާއި ސިޔާސަތުތަކުގެ އޮނިގަނޑުތައް އިތުރަށް ހަރުދަނާކުރުމާއި، ކުޑަކުދިން ހިމާޔަތްކުރުމުގެ ނިޒާމުތައް ވަރުގަދަކުރުމުގެ އިތުރުން ޑިޖިޓަލް މާހައުލުތަކުގައި ކުދިންނަށް އަމާންކަން ކަށަވަރުކޮށްދިނުމަކީވެސް މި ގަރާރުގެ މުހިންމު އަމާޒެކެވެ. މީގެއިތުރުން، އިދާރީ ގުޅުންތައް ބަދަހިކޮށް، ކުޑަކުދިންގެ ރައްކާތެރިކަމާއި ލާބައާ ގުޅޭ ނިންމުންތަކުގައި އެކުދިންގެ ބައިވެރިވުން މާނަހުރި ގޮތެއްގައި ހިމެނުމަށްވެސް މި ގަރާރުގައި އިސްކަންދީފައިވެއެވެ.
Advertisement
ކުޑަކުދިންގެ ހައްގުތައް ރައްކާތެރިކުރުމަށް ރާއްޖެއިން ކުރަމުންދާ މަސައްކަތްތަކަށް އަލިއަޅުއްވާލައްވަމުން އެ ވުޒާރާއިން ބުނީ، 2024 ވަނަ އަހަރު ރާއްޖެއިން 'ނޭޝަނަލް އެކްޝަން ޕްލޭން އޮން ޕްރިވެންޝަން އެންޑް ރެސްޕޯންޑިންގ ޓު ވަޔަލެންސް އަގެއިންސްޓް ޗިލްޑްރަން' އެކުލަވާލައި އަމަލުކުރަން ފަށާފައިވާ ކަމަށެވެ. އެ ޕްލޭންގެ ދަށުން ގޭތެރެއާއި، ސްކޫލްތަކާއި، މުޖުތަމައު އަދި އިންޓަނެޓްގެ ޒަރީއާއިން ކުދިންނަށް ލިބޭ ގެއްލުންތަކުން ރައްކާތެރިކޮށްދީ، ނުރައްކަލަށް ހުށަހެޅޭ ކުދިން ދުރާލާ ދެނެގަނެ އެހީތެރިކަން ފޯރުކޮށްދިނުމުގެ ނިޒާމު ވަނީ ގާއިމުކުރެވިފައެވެ.
މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ގީލާ އަލީ ވަނީ، ކުޑަކުދިންނަށް ކުރާ އަނިޔާތައް ހުއްޓުވުމަށްޓަކައި ދައުލަތުގެ މުއައްސަސާތަކާއި، އާއިލާތަކާއި، މަދަނީ ޖަމިއްޔާތައް އަދި ތަރައްގީގެ ބައިވެރިން ގުޅިގެން މުޅި މުޖުތަމައު އެކުގައި މަސައްކަތްކުރުމުގެ މުހިންމުކަން ފާހަގަކުރައްވާފައެވެ. އަދި ކުޑަކުދިންގެ ރައްކާތެރިކަމަށް ސަރުކާރުން ދެއްވާ އިސްކަމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށާއި، މި ދާއިރާއިން އެހީތެރިކަން ފޯރުކޮށްދޭ ޔުނިސެފް ފަދަ ބައިނަލްއަގުވާމީ ޖަމާއަތްތަކަށް މިނިސްޓަރު ޝުކުރު އަދާކުރެއްވިއެވެ.
މި ގަރާރުގައި ސޮއިކުރުމާއެކު، މިއީ ހަމައެކަނި ލިޔުމެއްގެ ގޮތުގައި ނުބާއްވައި، ކުޑަކުދިންގެ ދިރިއުޅުމަށް ހަގީގީ އަދި ދެމެހެއްޓެނިވި ހެޔޮ ބަދަލުތަކެއް ގެނައުމަށް އަމަލީ ގޮތުން މަސައްކަތްކުރާނެ ކަމުގެ ޔަގީންކަން ވުޒާރާއިން ވަނީ ދީފައެވެ. މީގެ ސަބަބުން މި ދާއިރާއިން ރާއްޖޭގައި ކުރެވޭ ގައުމީ މަސައްކަތްތައް އިތުރަށް ހަލުވިވެ، ބައިނަލްއަގުވާމީ މައިދާނުގައި ރާއްޖޭގެ ދައުރު އިތުރަށް ފުޅާވެގެންދާނެ ކަމަށް ބެލެވެއެވެ.
