ސަރުކާރުގެ ސިޔާސަތާ އެއްގޮތަށް ރައްޔިތުންނަށް ފޯރުކޮށްދޭ ޔުޓިލިޓީ ހިދުމަތްތަކުގެ ފެންވަރު އިތުރަށް މަތިކުރުމަށްޓަކައި އަޅަންޖެހޭ ފިޔަވަޅުތައް ދެނެގަނެ، އެކަންކަން ތަންފީޒުކުރުމަށްޓަކައި ކަމާބެހޭ ކުންފުނިތަކުގެ މެނޭޖިންގ ޑިރެކްޓަރުންނާއެކު ތިމާވެއްޓާ ބެހޭ ވަޒީރު އަލީ ޝަރީފް ބައްދަލުވުމެއް ބާއްވައިފިއެވެ. މި ބައްދަލުވުމުގައި ސްޓޭޓް އިލެކްޓްރިކް ކޮމްޕެނީ (ސްޓެލްކޯ)، މާލެ ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިޔުއެސްސީ) އަދި ފެނަކަ ކޯޕަރޭޝަންގެ މެނޭޖިންގ ޑިރެކްޓަރުންގެ އިތުރުން ތިމާވެއްޓާ ބެހޭ ވުޒާރާއާއި ކަމާގުޅުންހުރި އިދާރާތަކުގެ އިސްވެރިން ބައިވެރިވެވަޑައިގެންނެވިއެވެ. ބައްދަލުވުމުގެ މައިގަނޑު މަގްސަދަކީ ފެނާއި، ނަރުދަމާ އަދި ކަރަންޓުގެ ހިދުމަތް ފޯރުކޮށްދިނުމުގައި ދިމާވާ ގޮންޖެހުންތައް ހައްލުކޮށް، ހިދުމަތްތައް އިތުރަށް ހަރުދަނާކުރުމަށް ފުޅާ ދާއިރާއެއްގައި ހިޔާލު ބަދަލުކުރުމެވެ.
މި ބައްދަލުވުމުގައި ވަޒީރު އަލީ ޝަރީފް ވަނީ ރައްޔިތުންނަށް ލުއިފަސޭހަ އަދި އިތުބާރުހުރި ގޮތެއްގައި އަސާސީ ހިދުމަތްތައް ފޯރުކޮށްދިނުމަށް ސަރުކާރުން ހާއްސަ އިސްކަމެއް ދެއްވާކަން ފާހަގަކުރައްވާފައެވެ. އަދި ކަމާގުޅޭ އެންމެހައި މުއައްސަސާތައް ގުޅިގެން މަސައްކަތްކުރުމުގެ މުހިންމުކަމުގެ މައްޗަށް އެމަނިކުފާނު އަލިއަޅުއްވާލެއްވިއެވެ. މީގެ އިތުރުން، ކުންފުނީގެ ހިންގުން އިތުރަށް ހަރުދަނާކޮށް ބެލެހެއްޓުންތެރި ނިޒާމެއްގެ ދަށުން ހިދުމަތް ދިނުމަށްޓަކައި، 127 ރަށެއްގައި ހިދުމަތް ދެމުންދާ ފެނަކަ ކޯޕަރޭޝަން އުވާލައި، އެ ކުންފުނީގެ އެންމެހާ ހިދުމަތްތައް ސްޓެލްކޯގެ ދަށަށް ބަދަލުކުރުމަށް ސަރުކާރުން ވަނީ ނިންމާފައެވެ.
ޔުޓިލިޓީގެ ހިދުމަތްތައް އިތުރަށް ފުޅާކޮށް ހަރުދަނާކުރުމުގެ ގޮތުން ސަރުކާރުން ވަނީ ގިނަ ކަންތައްތަކެއް ކޮށްފައެވެ. އެގޮތުން ރަށްރަށުގެ ކަރަންޓު ކެޕޭސިޓީ އިތުރުކުރުމުގެ މަސައްކަތްތަކުގެ އިތުރުން، ރަށްރަށުގައި އަލަށް މީހުން އާބާދުވާ ސަރަހައްދުތަކަށް އަސާސީ ހިދުމަތްތައް ފޯރުކޮށްދިނުމުގެ މަސައްކަތްތައް ދަނީ ހުއްޓުމެއްނެތި ކުރިއަށްގެންދަމުންނެވެ. މީގެ އިތުރުން ފެނަކައާއި ސްޓެލްކޯ މެދުވެރިކޮށް ރާއްޖޭގެ ގިނަ ރަށްތަކެއްގައި އަވިން ހަކަތަ އުފައްދާ ނިޒާމުތައް ގާއިމުކޮށް، ސާފު ހަކަތަ ބޭނުންކުރުމުގެ ދާއިރާއިން ބޮޑެތި ކުރިއެރުންތަކެއް ވަނީ ހޯދާފައެވެ.
Advertisement
ކުރިއަށްއޮތް ތަނުގައި ސަރުކާރުން އެންމެ ބޮޑު އިސްކަމެއްދީގެން ހާސިލުކުރުމަށް ރާވާފައިވާ މައިގަނޑު ލަނޑުދަނޑިއަކީ، ރާއްޖޭގައި ޕީކް ގަޑީގައި ބޭނުންކުރާ ހަކަތައިގެ %33 އިއާދަކުރަނިވި ހަކަތައަށް ބަދަލުކުރުމުގެ ބޮޑު މަޝްރޫއު ތަންފީޒުކުރުމެވެ. ސަރުކާރުންނާއި ކަމާބެހޭ ކުންފުނިތަކުން އަމާޒުހިފާފައިވަނީ މުއައްސަސާތައް ގުޅިގެން، ރައްޔިތުންނަށް ދެވޭ އަސާސީ ހިދުމަތްތަކުގެ ފެންވަރު މަތިކޮށް، ދެމެހެއްޓެނިވި ގޮތެއްގައި އެ ހިދުމަތްތައް ފޯރުކޮށްދިނުމުގެ ނިޒާމު އިތުރަށް ވަރުގަދަކުރުމަށެވެ.
