މޫސުމީ ބަދަލުތަކާއި، ތިމާވެއްޓާއި ހަކަތައާ ބެހޭ ވުޒާރާއިން އިސްނަގައިގެން ކުރިއަށްގެންދާ "އެކްސެލެރޭޓިންގ ރިނިއުވަބަލް އެނަރޖީ އިންޓެގްރޭޝަން އެންޑް ސަސްޓެއިނަބަލް އެނަރޖީ" (އެރައިޒް) މަޝްރޫއުގެ ދަށުން، ގްރިޑް-ޓައިޑް ސޯލާ ޕީވީ ނިޒާމުތައް ގާއިމުކުރުމަށްޓަކައި ޗައިނާގެ ސައިނޯ ސޯ ހައިބްރިޑް (ބެއިޖިންގ) ޓެކްނޮލޮޖީ ކޯ ލިމިޓެޑާއެކު ޕަވަރ ޕާޗޭސް އެގްރީމަންޓް (ޕީޕީއޭ) ގައި ސޮއިކޮށްފިއެވެ.
މި އެއްބަސްވުމުގެ ދަށުން ރާއްޖޭގެ 13 ރަށެއްގައި އިއާދަކުރަނިވި ހަކަތައިގެ ނިޒާމު ފަރުމާކޮށް، ބިނާކުރުމާއި، ފައިނޭންސްކުރުމުގެ އިތުރުން ހިންގައި ބެލެހެއްޓުމުގެ މަސައްކަތް ކުރިއަށްދާނީ ދެ ލޮޓަކަށް ބަހާލައިގެންނެވެ.
މަޝްރޫއު ކުރިއަށްދާނެ ރަށްތައް:
Advertisement
- ލޮޓް 1: ލ. ހިތަދޫ، ލ. ކުނަހަންދޫ، ލ. މާބައިދޫ، ލ. މާމެންދޫ، ލ. މާވަަށް އަދި ލ. ދަނބިދޫ
- ލޮޓް 2: ލ. އިސްދޫ، ލ. ކަލައިދޫ، ލ. ފޮނަދޫ، ލ. ގަން، ޅ. ނައިފަރު، ގއ. ވިލިނގިލި އަދި ށ. ފުނަދޫ
ޖުމްލަ 15 މެގަވޯޓުގެ ސޯލާ ހަކަތަ އުފެއްދުމަށް ހަމަޖެހިފައިވާ މި މަޝްރޫއަކީ ކަރަންޓު އުފެއްދުމަށްޓަކައި ރާއްޖޭގައި ތެލަށް ބަރޯސާވާ މިންވަރު ކުޑަކޮށް، ދެމެހެއްޓެނިވި އަދި ތިމާވެއްޓާ ރައްޓެހި ހަކަތަ ރަށްރަށަށް ފޯރުކޮށްދިނުމަށް އެޅުނު ވަރަށް މުހިންމު ފިޔަވަޅެކެވެ. މިއީ ވޯލްޑް ބޭންކް އާއި، ކްލައިމެޓް ޓެކްނޮލޮޖީ ފަންޑު (ސީޓީއެފް) އަދި އޭޝިއަން އިންފްރާސްޓްރަކްޗަރ އިންވެސްޓްމަންޓް ބޭންކު (އޭއައިއައިބީ) ގެ އެހީތެރިކަމާއެކު ކުރިއަށްގެންދާ މަޝްރޫއެކެވެ.
މި ސޯލާ ޕީވީ ނިޒާމުތައް ގާއިމުކުރެވުމުން، ރަށްރަށުގެ އިންޖީނުގެތަކުން ތެޔޮ އެންދުން މަދުވެ، ދައުލަތުން ތެލަށް ކުރާ ހޭދައިން ބޮޑު ބައެއް ސަލާމަތްވެގެންދާނެއެވެ. އަދި ޖައްވަށް ދޫކުރާ ކާބަންގެ މިންވަރު ނުހަނު ބޮޑަށް ދަށްކުރެވި، ސަރުކާރުގެ އަމާޒުކަމުގައިވާ އިއާދަކުރަނިވި ހަކަތައިގެ މިންވަރު އިތުރުކުރުމުގެ ލަނޑުދަނޑިތަކަށް ވާސިލުވުމަށް ބޮޑު ބާރަކަށް ވެގެންދާނެއެވެ.
