އެމެރިކާއިން ގަލްފް އޮފް އޮމާންގައި އީރާނުގެ ތެޔޮ ބައުޒަރަކަށް ހަމަލާދީ ކަނޑު ފަށްތާލައިފި

ގަލްފް އޮފް އޮމާންގައި ދަތުރުކުރަމުންދިޔަ އީރާނުގެ ތެޔޮ ބައުޒަރަކަށް އެމެރިކާގެ އަސްކަރިއްޔާއިން ހަމަލާދީ، އެ އުޅަނދު ކަނޑު ފަށްތާލައިފި ކަމަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހާމަކޮށްފިއެވެ.

ސެންޓްކޮމްއިން މަޢުލޫމާތު ދީފައިވާ ގޮތުގައި، އެމެރިކާގެ މި ހަމަލާ އަމާޒުވެފައިވަނީ ގަލްފް އޮފް އޮމާންގެ ކަނޑުގެ ސަރަޙައްދުގައި ހަރަކާތްތެރިވަމުންދިޔަ އީރާނުގެ "އެމް/ޓީ ކައިލޯ" ނަމަކަށް ކިޔާ ތެޔޮ ބައުޒަރަކަށެވެ.

މި ހާދިސާއާ ގުޅިގެން ސެންޓްކޮމްއިން ވަނީ އެ އުޅަނދު އަޑިއަށްދާ މަންޒަރު ފެންނަ ވީޑިއޯއެއް މީސްމީޑިއާގައި އާންމުކޮށްފައެވެ. އާންމު ގޮތެއްގައި އަސްކަރީ އޮޕަރޭޝަންތަކުގައި ހަމަލާދޭ ވަގުތުގެ މަންޒަރުތައް ސެންޓްކޮމްއިން ދައްކައިދިން ނަމަވެސް، މި ފަހަރު އާންމުކުރި ވީޑިއޯއިން ހަމަލާ ދިން ސީދާ މަންޒަރެއް ނުފެނެއެވެ. އޭގެ ބަދަލުގައި އެ ވީޑިއޯއިން ފެންނަނީ ހަމަލާއަށްފަހު އެ ތެޔޮ ބައުޒަރު މަޑުމަޑުން ކަނޑުގެ އަޑިއަށް ގޮސް، މުޅިން އޮބިގެންދާ މަންޒަރެވެ.

މި ވީޑިއޯ ހިއްސާކުރަމުން ސެންޓްކޮމްއިން މަލާމާތުގެ ރާގެއްގައި ބުނެފައިވަނީ، އެ އުޅަނދު އަޑިއަށް ގޮސް މިހާރު ކަނޑުއަޑީގައިވާ އީރާނުގެ އަސްކަރިއްޔާގެ އެހެން އުޅަނދުތަކާ ގުޅިފައިވާ ކަމަށެވެ.

އެމެރިކާއިން ދިން މި ނުރައްކާތެރި ހަމަލާއާ ގުޅިގެން، އީރާނުގެ ސަރުކާރުން ނުވަތަ އެ ޤައުމުގެ އަސްކަރިއްޔާއިން ވެސް މިހާތަނަށް އެއްވެސް ރަސްމީ ބަޔާނެއް ނެރެފައެއް ނުވެއެވެ. މި ހާދިސާއާ ގުޅިގެން އެ ސަރަޙައްދުގެ މަސްރަޙު އިތުރަށް ހޫނުވެދާނެ ކަމަށް ބެލެވެއެވެ.