އެމެރިކާގެ ރައީސް ޑޮނަލްޑް ޓްރަމްޕާއި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ފޯނުން ވާހަކަދައްކަމުން، އީރާނާ ދެކޮޅަށް ގެންގުޅޭނެ ސްޓްރެޓެޖީއަކާ މެދު ވަރަށް ބޮޑަށް ހިޔާލުތަފާތުވެ ހޫނު ބަހުސެއް ކޮށްފައިވާކަމަށް ކަމަށް އިސްރާއީލުގެ މީޑިއާތަކުން ރިޕޯޓްކޮށްފިއެވެ. ނަމަވެސް، މި ވާހަކަތައް ނަތަންޔާހޫގެ އޮފީހުން ވަނީ ދޮގުކޮށްފައެވެ.
އިސްރާއީލުގެ "ޔެނެޓް" އަދި "ޔެދިއޯތު އަހްރޮނޯތު" ނޫހުން ރިޕޯޓްކޮށްފައިވާ ގޮތުގައި، ވޭތުވެދިޔަ ހަފްތާ ބަންދުގައި ދެ ލީޑަރުންގެ ދެމެދުގައި ކުރެވުނު މި ފޯނު ކޯލަކީ ވަރަށް ނުތަނަވަސް އަދި ބާރު އަޑުން ހަޅޭއްލަވައިގަތް ވަރުގެ ހޫނު ޒުވާބެކެވެ. ރިޕޯޓްތައް ބުނާ ގޮތުގައި މި ހިޔާލުތަފާތުވުން އުފެދުނީ އީރާނާ ދެކޮޅަށް އަސްކަރީ ހަމަލާތައް އަލުން ފެށުމާ ގުޅޭ ގޮތުންނެވެ. ނަތަންޔާހޫ ބާރުއަޅުއްވަމުން ގެންދަވަނީ އީރާނުގެ ވެރިކަން ވައްޓާލުމަށްޓަކައި އަސްކަރީ ވަރުގަދަ ހަމަލާތަކެއް ދިނުމަށެވެ. އެހެންނަމަވެސް، ޓްރަމްޕް ބޭނުންވަނީ އަސްކަރީ ފިޔަވަޅުތަކުގެ ބަދަލުގައި، ކަނޑުގެ މަގުތައް ބަންދުކުރުން ފަދަ އިގްތިސާދީ ދަތިކުރުމުގެ ފިޔަވަޅުތަކާއެކު ޑިޕްލޮމެޓިކް ހައްލެއް ހޯދުމަށެވެ.
މި ރިޕޯޓްތައް ދޮގުކުރަމުން ނަތަންޔާހޫގެ އޮފީހުން ބުނީ މިއީ އެއްވެސް އަސާސެއް ނެތް "ފޭކް ނިއުސް" އެއް ކަމަށެވެ. އަދި އިސްރާއީލުގެ އިސް އޮފިޝަލަކު އެ ފޯނު ކޯލު ހިނގިކަން ކަށަވަރުކޮށްދިން ނަމަވެސް، އެއީ އުނދަގޫ އަދި ހޫނު ވާހަކަތަކެއް ހިނގި ކޯލެއް ނޫން ކަމަށް ވަނީ ބުނެފައެވެ.
Advertisement
އެހެންނަމަވެސް، އިސްރާއީލުގެ 26 ވަނަ ކްނެސެޓް (ޕާލަމެންޓް) ހުވާކުރުމުގެ ރަސްމިއްޔާތުގައި ވާހަކަދައްކަމުން ނަތަންޔާހޫ ބުނީ، އީރާނުން އަނެއްކާވެސް ނިއުކްލިއަރ ނުރައްކާ އުފައްދަން މަސައްކަތްކުރަމުންދާ ކަމަށާއި، އެ ނުރައްކާ އެއްކޮށް ނައްތާލެވެން އޮތް ހަމައެކަނި ގޮތަކީ އީރާނުގެ ވެރިކަން ވައްޓާލުން ކަމަށެވެ.
މިކަމާ ގުޅޭގޮތުން ޓްރަމްޕް ދާދިފަހުން ގަތަރުގެ ބޮޑުވަޒީރާ ބައްދަލުކުރެއްވުމަށްފަހު ނޫސްވެރިންނަށް ބުނީ، މިވަގުތު އީރާނާ ދެކޮޅަށް ބޮޑު އަސްކަރީ ހަރަކާތެއް ހިންގުމަކީ މުހިންމު ކަމެއްގެ ގޮތުގައި ނުދެކޭ ކަމަށެވެ. އެހެންނަމަވެސް އެމެރިކާގެ ސިފައިން ތިބީ ކޮންމެ ވަގުތަކުވެސް ހަރަކާތްތެރިވާން ތައްޔާރަށް ކަމަށް އޭނާ ފާހަގަކުރިއެވެ.
ވައިޓް ހައުސްއިން "ފޮކްސް ނިއުސް" އަށް މައުލޫމާތު ދެމުން ބުނީ، ހޮރްމުޒް ކަނޑުއޮޅި ކޮންޓްރޯލްކޮށް، އީރާނުގެ އިގްތިސާދު ބަލިކަށިވަމުންދާ މިދަނޑިވަޅުގައި އެމެރިކާ އޮތީ ވަރަށް ވަރުގަދަ މަގާމެއްގައި ކަމަށެވެ. އަދި ޓްރަމްޕް އަޅުއްވަމުން ގެންދަވާ އިގްތިސާދީ ފިޔަވަޅުތަކާއި ކަނޑުގެ ބްލޮކޭޑްތައް ފުރިހަމައަށް ކުރިއަށްދާނެ ކަމަށާއި، އެމަނިކުފާނު ނިންމަވާނީ އެމެރިކާއަށް އެންމެ ފައިދާހުރި ގޮތް ކަމަށްވެސް ވައިޓް ހައުސްއިން ބުންޏެވެ.
މީގެ ކުރިންވެސް މެދުއިރުމަތީގެ ސިޔާސަތުތަކާ މެދު މި ދެ ލީޑަރުންގެ މެދުގައި ހޫނު ބަހުސްތަކެއް ހިނގާފައިވާއިރު، އީރާނާއެކު ކުރެވެމުންދާ މަޝްވަރާތައް އެއްވެސް ކުރިއެރުމެއް ނުލިބި ހުއްޓިފައި އޮންނަތާ މިހާރު ވަނީ މަސްތަކެއް ވެފައެވެ.
