ނިއުކްލިއަރ ހަތިޔާރު ފެތުރުން މަނާކުރާ ބައިނަލްއަޤްވާމީ މުޢާހަދާ (އެން.ޕީ.ޓީ) އިން އީރާން ވަކިވުމާމެދު ގޮތެއް ނިންމުމަށާއި، އެޤައުމުގެ ދިފާޢީ ސިޔާސަތު އަލުން މުރާޖަޢާ ކުރުމަށް އީރާނުގެ އެންމެ ބާރުގަދަ ދީނީ އަދި ސިޔާސީ މަޖިލިސް ކަމަށްވާ "އެސެމްބްލީ އޮފް އެކްސްޕާޓްސް" އިން ގޮވާލައިފިއެވެ.
މި މަޖިލީހުން ނެރުނު ރަސްމީ ބަޔާނެއްގައި ބުނެފައިވަނީ، އެމެރިކާއާއި އިސްރާއީލުން އީރާނުގެ ނިއުކްލިއަރ ޕްރޮގްރާމަށް ދެމުންދާ ތަކުރާރު އިންޒާރުތަކާއި ހަމަލާތަކުގެ ސަބަބުން، އީރާނުގެ ޤައުމީ މަޞްލަޙަތު ޙިމާޔަތްކުރުމަށް ބައިނަލްއަޤްވާމީ އިދާރާތަކަށް ބަރޯސާވެވެން ނެތްކަން ހާމަވެފައިވާ ކަމަށެވެ. އެހެންކަމުން، އެން.ޕީ.ޓީ މުޢާހަދާއިން ވަކިވުމާމެދު ވިސްނުމާއި ދިފާޢީ ސިޔާސަތަށް ބަދަލު ގެނައުމަކީ މިހާރު ކޮންމެހެން ކުރަންޖެހިފައިވާ ޤައުމީ ޑިމާންޑެއްގެ ގޮތުގައި އެ މަޖިލީހުން ވަނީ ސިފަކޮށްފައެވެ.
މީގެ އިތުރުން، އީރާނާ ދެކޮޅަށް އިތުރު އެއްވެސް ހަމަލާއެއް ދީފިނަމަ، އެޤައުމުގެ އަސްކަރިއްޔާއިން "ޖިއޮގްރަފީގެ އެއްވެސް ހައްދެއް ނެތި" ވަގުތުން ވަރުގަދަ ރައްދެއް ދޭނެ ކަމުގެ އިންޒާރުވެސް އެސެމްބްލީ އޮފް އެކްސްޕާޓްސް އިން ވަނީ ދީފައެވެ. އަދި ދުޝްމަނުން އީރާނާ ދެކޮޅަށް އިޤްތިޞާދީ ހަނގުރާމައެއް ފަށައި ޤައުމު ޙިޞާރުކުރަން މަސައްކަތް ކުރަމުންދާ ކަމަށް ބުނެ، ރޫޙާނީ ލީޑަރުގެ އޮފީހުގެ ބެލުމުގެ ދަށުން "ވޯ އިކޮނޮމީ ހެޑްކުއާޓަރސް" އެއް އުފެއްދުމަށްވެސް އެ މަޖިލީހުން ވަނީ ހުށަހަޅާފައެވެ.
Advertisement
88 މެންބަރުންގެ މައްޗަށް އެކުލެވޭ އެސެމްބްލީ އޮފް އެކްސްޕާޓްސް އަކީ އީރާނުގެ އެންމެ މަތީ ރޫޙާނީ ލީޑަރު ޢައްޔަންކުރުމާއި، މަޤާމުން ވަކިކުރުމުގެ ބާރު ލިބިފައިވާ އެންމެ ނުފޫޒުގަދަ މަޖިލީހެވެ. ނަމަވެސް، އެން.ޕީ.ޓީ މުޢާހަދާއިން އީރާން ވަކިވުމާމެދު އެންމެ ފަހު ނިންމުން ނިންމަވާނީ އެޤައުމުގެ ރޫޙާނީ ލީޑަރު ސައްޔިދު މުޖްތަބާ ޚާމަނާއީއެވެ.
