ރިސޯޓުތަކަށް ލިބޭ ބޭރު ފައިސާގެ 40 އިންސައްތަ މާރުކުރަން ޖެހުނު ނަމަވެސް، މުވައްޒަފުންނަށް ޑޮލަރުން މުސާރަ ދިނުން ހުއްޓާލައިގެން ނުވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރައީސް އޮފީހުގައި މިއަދު މެންދުރުފަހު ބޭއްވި ރަސްމިއްޔާތެއްގައި "ބޭރު ފައިސާއާ ބެހޭ ބިލު" ތަސްދީގުކުރެއްވުމަށްފަހު ވާހަކަފުޅު ދައްކަވަމުން ރައީސް ވިދާޅުވީ، ކުރިން ރިސޯޓުތަކުން ބޮލަކަށް 500 ޑޮލަރު މާރުކުރަން އޮތް އޮތުން ބަދަލުވެ، މާދަމާއިން ފެށިގެން ޖުމްލަ އާމްދަނީގެ 40 އިންސައްތަ ބޭންކުތަކަށް މާރުކުރަން ޖެހޭނެ ކަމަށެވެ. ނަމަވެސް، ގެސްޓްހައުސްތަކާއި މި ދާއިރާގައި މަސައްކަތްކުރާ ދިވެހިންނަށް މިހާރު އޮތް މިންވަރަށް ބަދަލެއް ނާންނާނެ ކަމުގައި ވިދާޅުވިއެވެ.
މި އިސްލާހާއެކު އެމްއެމްއޭ މެދުވެރިކޮށް އަސާސީ މުދާ އިމްޕޯޓްކުރުމަށާއި ވިޔަފާރިވެރިންނަށް ޓީޓީ ހެދުމުގައި ބޮޑެތި ލުއިތަކެއް ލިބޭނެ ކަމަށްވެސް ރައީސް ވިދާޅުވިއެވެ. ރައީސް ފާހަގަކުރެއްވި ގޮތުގައި ފަތުރުވެރިކަމުން މިދިޔަ އަހަރު 5.6 ބިލިއަން ޑޮލަރު ލިބުނުއިރު، ރާއްޖޭގެ ބޭންކިން ނިޒާމަށް ވަނީ މީގެން 3.8 ބިލިއަން ޑޮލަރެވެ. އަދި އޭގެ ތެރެއިން މާރުކޮށްފައިވަނީ އެންމެ 21 އިންސައްތައެވެ.
Advertisement
"ރިސޯޓުތައް ހަދަން ނަގާފައިވާ ލޯނުތައް ދެއްކުމަށް، ނުވަތަ މުވައްޒަފުންނަށް މުސާރަ ދިނުމަށް، ނުވަތަ އޮޕަރޭޝަނަލް ޚަރަދުތަކަށް އެއްވެސް ދައްޗެއް ނުވާނެ ސާޅީސް އިންސައްތަ މާރުކޮށްގެން. އެއީ ޔަގީންކަމެއް،" ކަމާބެހޭ އިދާރާތަކުން ދިރާސާކުރުމަށްފަހު ގެނައި މި ބަދަލާ މެދު ރައީސް ވިދާޅުވިއެވެ.
ރައީސް ވަނީ މުވައްޒަފުންގެ މުސާރައާއި ލޯނުތައް ދެއްކުމަށްފަހުވެސް 40 އިންސައްތަ މާރުކުރެވޭނެ ތަނަވަސްކަން ހުންނާނެކަން ފާހަގަކުރައްވައި، ޑޮލަރުން މުސާރަ ދިނުން ހުއްޓާލުމަށް އެއްވެސް އުޒުރެއް ނެތް ކަމަށް ވިދާޅުވެފައެވެ.
މި ގާނޫނާއެކު ޑޮލަރުން މުސާރައާއި ސާވިސް ޗާޖު ނުދެވޭނެކަން ރިސޯޓުތަކުން އަންގަމުންދާތީ، އެކަމާ ދެކޮޅަށް މުވައްޒަފުން ވަނީ ޕެޓިޝަނެއްގައި ސޮއިކުރަން ފަށައިފައެވެ. އޭގެ އިތުރުން، 2030 އާ ހަމައަށްދާއިރު ރާއްޖޭގެ އެތެރޭގެ މުއާމަލާތްތައް ދިވެހި ރުފިޔާއަށް ބަދަލުކުރުމަކީ އެމްއެމްއޭގެ އަމާޒެއް ކަމަށް ގަވަރުނަރު އަޙްމަދު މުނައްވަރުވެސް ވަނީ މީގެ ކުރިން ވިދާޅުވެފައެވެ.
