ނ. މާފަރާއި އެ އަތޮޅު ކުޑަފަރީގެ ސިއްހީ މަރުކަޒު ތަރައްގީކުރަން ބަޔަކާ ހަވާލުކޮށްފި އެވެ.
މާފަރާއި ކުޑަފަރީގެ ސިއްހީ މަރުކަޒު ތަރައްގީކުރުމުގެ އެއްބަސްވުންތަކުގައި ދެ ކުންފުންޏަކާއެކު ސޮއިކުރީ މިނިސްޓްރީގައި ރޭ ބޭއްވި ހާއްސަ ރަސްމިއްޔާތެއްގަ އެވެ.
ހެލްތު މިނިސްޓްރީން ބުނީ ކުޑަފަރީ ސިއްހީ މަރުޒަކުގެ އާ އިމާރާތުގެ މަސައްކަތްކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އާއެކު އެއްބަސްވުމުގައި ސޮއިކޮށްފައިވާ ކަމަށެވެ.
އެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު އިސްމާއިލް ޝަރީފެވެ. އަދި އެމްޓީސީސީގެ ފަރާތުން އެއްބަސްވުމުގައި ސޮއިކުރެއްވީ މެނޭޖިން ޑިރެކްޓަރު އަހްމަދު ސައުދީ އެވެ.
މިނިސްޓްރީން ބުނީ އެ މަސައްކަތް ހަވާލުކުރީ އެއް އަހަރު ދުވަހުގެ ތެރޭގައި ނިންމުމަށް، 27.6 މިލިއަން ރުފިޔާއަށް ކަމަށެވެ.
މާފަރު ސިއްހީ މަރުކަޒު އަޕްގްރޭޑްކުރުމުގެ މަސައްކަތް ހަވާލުކުރީ ފެނަކަ ކޯޕަރޭޝަނާ އެވެ.
އެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު އިސްމާއިލް އަބްދުﷲ އެވެ. އަދި ފެނަކަ ކޯޕަރޭޝަންގެ ފަރާތުން ސޮއިކުރެއްވީ ޑެޕިއުޓީ މެނޭޖިން ޑިރެކްޓަރު މުހައްމަދު އާރިފެވެ.
މިނިސްޓްރީން ބުނީ އެ މަސައްކަތް ހަވާލުކުރީ އެއް އަހަރާއި ތިން މަސްދުވަހުގެ ތެރޭގައި ނިންމުމަށް، 10.9 މިލިއަން ރުފިޔާއަށް ކަމަށެވެ.
އެ މަޝްރޫއުގެ ދަށުން މާފަރު ސިއްހީ މަރުކަޒަށް ހަތަރު އެނދުގެ ވޯޑެއް އިތުރުކޮށް، ޕްރައިވެޓް ރޫމަކާއި ނާސިން ސްޓޭޝަންނަކާއި މީޓިން ހޯލަކާއި ޕަބްލިކް ހެލްތު ޔުނިޓްގެ އިތުރުން ޕޯޓިކޯ ގާއިމްކުރާނެ ކަމަށް ހެލްތު މިނިސްޓްރީން ބުންޏެވެ.
