މި މަހު 26 ގައި ހުޅުވުމަށް ތައްޔާރުވަމުން އަންނަ ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލުގެ ސަލާމަތީ ނިޒާމުތައް އިންސްޕެކްޓްކުރުމުގެ މަސައްކަތް ޑައިރެކްޓޮރޭޓް އޮފް އޭވިއޭޝަން ސެކިޔުރިޓީ އެޑްމިނިސްޓްރޭޝަން (ޑާސާ) އިން މިއަދު ފަށައިފި އެވެ.
ޑިފެންސް މިނިސްޓްރީން ބުނީ އާ ޓާމިނަލްގައި ގާއިމްކޮށްފައިވާ ސަލާމަތީ ނިޒާމުތައް ޓެސްޓްކޮށް، އޭވިއޭޝަން ސެކިއުރިޓީ މަސައްކަތުގައި ބޭނުންކުރުމުގެ ހުއްދަ ދިނުމަށްޓަކާ ކުރިއަށް ގެންދަން ޖެހޭ އިންސްޕެކްޝަންތައް އެ މިނިސްޓްރީގެ ދަށުން ހިންގާ ޑާސާއިން މިހާރު ކުރަމުން އަންނަ ކަމަށެވެ.
ސަލާމަތީ ނިޒާމުތައް ޓެސްޓްކުރުމުގެ މަސައްކަތް ކުރިއަށް ގެންދިޔުމަށް ރޭވިފައި ވަނީ އެ އެއާޕޯޓް ހިންގާ އެމްއޭސީއެލްއާ ގުޅިގެން ނެޝަނަލް ސިވިލް އޭވިއޭޝަން ސެކިއުރިޓީ ޕްރޮގްރާމްގެ މިންގަނޑުތަކާ އެއްގޮތަށް، ނިޒާމީ ގޮތެއްގައި ތަފާތު ބައިތަކަށް ބަހާލައިގެން ކަމަށް މިނިސްޓްރީން ބުންޏެވެ.
މިނިސްޓްރީން ބުނީ މިއަދުގެ އިންސްޕެކްޝަންގައި އާ ޓާމިނަލްގެ އެކްސެސް ކޮންޓްރޯލް އަދި ސީސީޓީވީ ނިޒާމު ބަލައި ޓެސްޓުކޮށްފައިވާ ކަމަށެވެ. އަދި ކުރިއަށް އޮތް ދުވަސްތަކުގައި އޭވިއޭޝަން ސެކިއުރިޓީ މަސައްކަތުގައި ބޭނުންކުރުމަށް ގާއިމްކޮށްފައިވާ ހޯލްޑް ބެގޭޖް ސްކްރީނިން އަދި ބެގޭޖް ހޭންޑްލިން ސިސްޓަމްގެ ޓެސްޓްކުރުމަށްޓަކާ ބެގެޖް ސްކްރީނިން ޓްރަޔަލް ސެޝަންތައް ކުރިއަށް ގެންދާނެ ކަމަށް މިނިސްޓްރީން ބުންޏެވެ.
އޭގެ އިތުރުން، އޭވިއޭޝަން ސެކިއުރިޓީ މަސައްކަތުގައި ބޭނުންކުރުމަށް ގާއިމުކޮށްފައިވާ އެހެނިހެން އިކުއިޕްމެންޓްތައް ޓެސްޓް ކުރުމުގެ މަސައްކަތާއި އާ ޓާމިނަލްގައި ގާއިމުކޮށްފައިވާ އިކުއިޕްމެންޓްތަކާއި އެކްސްސް ކޮންޓްރޯލް ނިޒާމާއި ސީސީޓީވީ ނިޒާމު ބޭނުންކުރުމުގެ އެސްއޯޕީތައް ރިވިއުކޮށް ހުއްދަ ދިނުމުގެ މަސައްކަތް ވެސް ކުރާނެ ކަމަށް މިނިސްޓްރީން ބުންޏެވެ.
ވެލާނާ އެއާޕޯޓުގެ އާ ޓާމިނަލް ހުޅުވަނީ ރާއްޖޭގެ މިނިވަންކަމަށް 60 އަހަރު ފުރޭ މުނާސަބަތާ ދިމާކޮށް މި މަހު 26 ގަ އެވެ.
