ދިވެހި ފުލުހުންގެ ހިދުމަތުން 2027 ވަނަ އަހަރަށް ކަނޑައަޅާ މައިގަނޑު އަމާޒުތަކާއި އަހަރީ އެކްޝަން ޕްލޭން އެކުލަވާލުމަށްޓަކައި ބާއްވާ "އެންސީޕީއެލްއީ އެނުއަލް ޕޮލިސިންގ ކޮންފަރެންސް 2026" މިއަދު ރަސްމީކޮށް ފަށައިފިއެވެ.
ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓާއި ސްޓްރެޓީޖިކް ޕްލޭނިންގ އެންޑް ލީގަލް ސަރވިސަސް ގުޅިގެން އިސްކަންދަރު ކޮށީގައި ކުރިއަށްގެންދާ މި ކޮންފަރެންސް ކުރިއަށްދާނީ މި ހިނގާ ނޮވެމްބަރު މަހުގެ 8 އިން 10 އަށެވެ. ތިން ދުވަހުގެ މުއްދަތަށް ކުރިއަށްދާ މި ހަރަކާތަކީ ހޯމް މިނިސްޓަރު އަލީ އިހްސާން އަދި ކޮމިޝަނަރ އޮފް ޕޮލިސް އަހްމަދު މުހައްމަދުގެ ހާއްސަ އިސްނެންގެވުމުގެ މަތިން އިންތިޒާމުކޮށްފައިވާ ކޮންފަރެންސެކެވެ.
ފުލުހުންގެ ހިދުމަތުން މައުލޫމާތު ދިން ގޮތުގައި، މި ކޮންފަރެންސްގެ މައިގަނޑު ބޭނުމަކީ އިލްމީ ދިރާސާތަކާއި، ހޯދުންތަކުގެ އިތުރުން ފުލުހުންގެ އޮޕަރޭޝަނަލް ތަޖުރިބާތަކުގެ އަލީގައި، އަމަލީ ގޮތުން ނަތީޖާ ނެރެވޭނެ ހަރުދަނާ ސިޔާސަތުތަކަކާއި ފިޔަވަޅުތަކެއް އެކަށައެޅުމެވެ. އެގޮތުން ރާއްޖޭގެ އެކި ކަންކޮޅުތަކުގައި ފުލުހުންގެ ހިދުމަތް ބޭނުންވާ މިންވަރާއި، ވިލުންވެރިކަމާއެކު ކުށުގެ ވެއްޓަށް އަންނަ ބަދަލުތަކަށް ހޭނުމާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވޭނެއެވެ. އަދި މި ބައްދަލުވުމުގެ ސަބަބުން މުއައްސަސާއިން އެންމެ އިސްކަންދޭންޖެހޭ ދާއިރާތައް ދެނެގަނެވި، ސާފު ލަނޑުދަނޑިތަކެއް ކަނޑައެޅިގެންދާނެ ކަމަށްވެސް އެ އިދާރާއިން ވިދާޅުވިއެވެ.
Advertisement
މި ކޮންފަރެންސްގައި ހިނގާ މަޝްވަރާތަކަށް ބިނާކޮށް، 2027 ވަނަ އަހަރުގެ އެކްޝަން ޕްލޭންގައި ހިމެނޭ ވަކިވަކި ޒިންމާތައް ތަރުތީބުކޮށް، ރައްޔިތުންނަށް ފޯރުކޮށްދޭ ހިދުމަތުގެ ފެންވަރު މަތިކުރުމަށާއި މުޖުތަމައުގެ އަމަންއަމާންކަން ކަށަވަރުކުރުމަށް ބޭނުންވާ މުހިންމު ސްޓްރެޓަޖީތައް ބައްޓަންކުރުމަށް ވަނީ ހަމަޖެހިފައެވެ.
