ސްކޫލް ދަރިވަރުންތަކެއް އިންޓަނެޓް މެދުވެރިކޮށް އެހެން ދަރިވަރަކަށް ގަނާކުރި މައްސަލައެއް ފުލުހުން ތަހުގީގުކުރަން ފަށައިފި

ސެންޓްރަލް ޕޮލިސް ރީޖަންގައި ހިމެނޭ ރަށެއްގެ ސްކޫލު ދަރިވަރަކަށް، އެހެން ދަރިވަރުންތަކެއް އިންޓަނެޓް މެދުވެރިކޮށް ބުލީ ނުވަތަ ގަނާކުރި ކަމަށް ތުހުމަތުކުރެވޭ މައްސަލައެއް ފުލުހުން ބަލަން ފަށައިފިއެވެ.

ފުލުހުންގެ ހިދުމަތުން މީޑިއާތަކަށް ފޮނުވި މެސެޖެއްގައި ވިދާޅުވީ، ކަމާގުޅުންހުރި އިދާރާތަކާ ގުޅިގެން މި މައްސަލަ ވަރަށް ސީރިއަސް މައްސަލައެއްގެ ގޮތުގައި ތަޙުޤީޤުކުރަމުންދާ ކަމަށެވެ.

އިންޓަނެޓް މެދުވެރިކޮށް ގަނާކުރުމަކީ (ސައިބާ ބުލީއިންގ) ދަރިވަރުންގެ ނަފްސާނީ ދުޅަހެޔޮކަމަށާއި އިޖުތިމާއީ ދިރިއުޅުމަށް އޭގެ ނޭދެވޭ އަސަރު އިންތިހާއަށް ފޯރާނެ ކަމަކަށް ވާތީ، މިފަދަ މައްސަލަތައް ހައްލުކުރުމަށް ކަމާބެހޭ މުއައްސަސާތަކުން ޚާއްޞަ އިސްކަމެއް ދީގެން އަންނަނީ މަސައްކަތްކުރަމުންނެވެ.

މި ހާދިސާ ހިނގި ރަށާއި، މައްސަލައިގައި ޝާމިލުވާ ފަރާތްތަކުގެ އެއްވެސް ތަފްސީލެއް ކުޑަކުދިންގެ ކަރާމާތް ރައްކާތެރިކުރުމުގެ ގޮތުން ފުލުހުން އަދި ހާމަކޮށްފައެއް ނުވެއެވެ.

ފުލުހުން އިތުރަށް ބުނީ، މި މައްސަލައިގެ ތަޙުޤީޤު ކުރިއަށްދާ މިންވަރަކުން އިތުރު މައުލޫމާތު ހާމަކުރަމުން ގެންދާނެ ކަމަށެވެ.