ފެނަކަ ކޯޕަރޭޝަންގެ ޗެއާމަންގެ މަގާމަށް ފިނޭންސް މިނިސްޓްރީގެ ސްޓޭޓް މިނިސްޓަރު ނ. ފޮއްދޫ، ޔާގޫތުގޭ، ހުސައިން ޝާމް އާދަމް މިއަދު އައްޔަނުކުރައްވައިފި އެވެ.
ޝާމް އެމަގާމަށް އައްޔަނުކުރިކަން ޕްރަވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އިއުލާނުކުރީ އެކްސްގައި މިއަދު ކުރި ޕޯސްޓެއްގަ އެވެ. ޕީސީބީން ބުނިގޮތުގައި ޝާމް އައްޔަނުކޮށްފައިވަނީ ފެނަކަ ކޯޕަރޭޝަނުގެ ބޯޑު މެމްބަރުކަމަށާއި އެކުންފުނީގެ ޗެއާޕާސަންގެ މަގާމަށެވެ.
ފިނޭންސް މިނިސްޓްރީގެ ސްޓޭޓް މިނިސްޓަރުގެ ގޮތުގައި ހުންނެވި ޝާމް ވަނީ ކުރީގެ ރައީސް އަބްދުﷲ ޔާމީންގެ ދައުރުގައި ފެނަކައިގެ ބޯޑު މެންބަރުކަމާއި ފިނޭންސް މިނިސްޓްރީގެ ޑެޕިއުޓީ މިނިސްޓަރުގެ މަގާމުވެސް ފުރުއްވާފަ އެވެ.
ކުރިން ފެނަކައިގެ ޗެއާމަންގެ މަގާމުގައި ހުންނެވީ އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް އެވެ.
