މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން ސަރުކާރުގެ ފަސް މިލިއަން ގަސް އިންދުމުގެ ޕްރޮގްރާމްގައި ބައިވެރިވެއްޖެ އެވެ. 

އެމްއޭސީއެލުން އެ ޕްރޮގްރާމް ރަސްމީކޮށް ފެށުމުގެ ގޮތުން އިއްޔެ ހަވީރު ވެލާނާ އިންޓަނޭޝަނަލް އެއާޕޯޓް (ވީއައިއޭ)ގައި ހާއްސަ ރަސްމިއްޔާތެއް ބޭއްވި އެވެ.

އެ ރަސްމިއްޔާތުގައި ގަސް އިންދުމުގެ ޕްރޮގްރާމް ފައްޓަވާދެއްވީ އެމްއޭސީއެލްގެ މެނޭޖިން ޑިރެކްޓަރު އިބްރާހީމް ޝަރީފް މުހައްމަދާއި ތިމާވެއްޓާ ބެހޭ މިނިސްޓަރު ތޯރިގް އިބްރާހިމެވެ.

އެ ގަސްތައް އިންދާފައި ވަނީ މި މަހު 26 ގައި ހުޅުވަން ނިންމާފައިވާ ވެލާނާ އެއާޕޯޓުގެ އާ ޓާމިނަލްއާ ކައިރީގަ އެވެ.

އެމްއޭސީއެލްގެ އަމާޒަކީ މި އަހަރު ނިމޭއިރު 100،000 ގަސް އެ ކުންފުނިން އިންދުމެވެ.

ރައީސް ޑރ. މުހައްމަދު މުއިއްޒު އިސްނަންގަވައިގެން ފެއްޓެވި ފަސް މިލިއަން ގަސް ޕްރޮގްރާމުގެ މަގުސަދަކީ ރާއްޖޭގެ ތިމާވެށި ރައްކާތެރިކުރުމާއި ގަސްގަހާގެހި ގިނަކޮށް ރާއްޖެއަށް ދިމާވެފައިވާ ތިމާވެށީގެ ގޮންޖެހުންތަކަށް ހައްލެއް ހޯދުމެވެ.

އެ ޕްރޮގްރާމްގެ ދަށުން މި ސަރުކާރުގެ ފަސް އަހަރު ދުވަހުގެ ތެރޭގައި ގަސް އިންދުމަށް ސަރުކާރުގެ އެކި އޮފީސްތަކާއި ކުންފުނިތަކާއި ސްކޫލްތަކާއި އަމިއްލަ ޖަމިއްޔާތަކުން ވެސް ވަނީ އަހުދުނާމާގައި ސޮއިކޮށްފައެވެ.