ރިސޯޓު ކުލީގެ ގޮތުގައި ދައުލަތަށް ލިބުނު އާމްދަނީ %10.8 އިތުރުވެއްޖެ

މިއަހަރުގެ މިހާތަނަށް ރިސޯޓު ކުލީގެ ގޮތުގައި ދައުލަތަށް ލިބުނު އާމްދަނީ، ވޭތުވެދިޔަ އަހަރުގެ މި މުއްދަތާ އަޅާބަލާއިރު ބޮޑުތަނުން އިތުރުވެއްޖެއެވެ.

މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން އާންމުކޮށްފައިވާ ތަފާސްހިސާބުތަކަށް ބަލާއިރު، މިއަހަރުގެ ފުރަތަމަ ނުވަ މަސްދުވަހުގެ ތެރޭގައި ރިސޯޓު ކުލީގެ ގޮތުގައި ދައުލަތަށް 1.6 ބިލިއަން ރުފިޔާ ލިބިފައިވެއެވެ. މިއީ ވޭތުވެދިޔަ އަހަރުގެ މި މުއްދަތުގައި ލިބުނު 1.4 ބިލިއަން ރުފިޔާއާ އަޅާބަލާއިރު %10.8 ގެ ކުރިއެރުމެކެވެ. މީރާގެ ތަފާސްހިސާބުތަކުން ދައްކާ ގޮތުގައި އަހަރުން އަހަރަށް މި ދާއިރާއިން ލިބޭ އާމްދަނީ އަންނަނީ މެދުކެނޑުމެއްނެތި އިތުރުވަމުންނެވެ.

ޓޫރިޒަމް މިނިސްޓްރީގެ އެންމެ ފަހުގެ ހިސާބުތައް ދައްކާ ގޮތުން، ރާއްޖޭގައި ރަޖިސްޓްރީކޮށްފައިވާ 184 ރިސޯޓުގެ ތެރެއިން 180 ރިސޯޓެއް މިވަގުތު އޮޕަރޭޓްކުރަމުން ދެއެވެ. އަދި މި ތަންތަނުގައި ފަތުރުވެރިންނަށް ހިދުމަތް ދިނުމަށް 45،171 އެނދު ވަނީ ހަމަޖައްސާފައެވެ. ރާއްޖެ ޒިޔާރަތްކުރާ ފަތުރުވެރިންގެ ބޮޑު އިންސައްތައެއް ޗުއްޓީ ހޭދަކުރަނީ ރިސޯޓުތަކުގައެވެ. އެގޮތުން މިއަހަރު ޒިޔާރަތްކުރި ފަތުރުވެރިންގެ %73.8، ނުވަތަ 1.2 މިލިއަނަށް ވުރެ ގިނަ ފަތުރުވެރިން ޗުއްޓީ ހޭދަކޮށްފައިވަނީ ރިސޯޓުތަކުގައެވެ.

ރިސޯޓު ކުލިން ލިބޭ އާމްދަނީ އިތުރުވަމުން ދިޔަ ނަމަވެސް، ފަތުރުވެރިކަމަށް ދޫކޮށްފައިވާ ގިނަ އަދަދެއްގެ ރަށްތަކާއި ފަޅުތައް ތަރައްގީނުކުރެވި ގިނަ ދުވަސްތަކެއް ވަމުންދާކަން ވަނީ ފާހަގަކުރެވިފައެވެ. ޓޫރިޒަމް މިނިސްޓަރު މުހައްމަދު އަމީން ދާދިފަހުން ވިދާޅުވި ގޮތުގައި، ތަރައްގީ ނުކުރެވި 161 ރަށާއި ފަޅު އެބައޮތެވެ. އޭގެ ތެރޭގައި އެއްބަސްވުން ހަދާތާ 20 އަހަރާއި 25 އަހަރު ވެފައިވާ ތަންތަން ހިމެނޭއިރު، އެ ތަންތަނުން ކުލީގެ ގޮތުގައި ދައުލަތަށް ލިބެންޖެހޭ ފައިސާގެ އަދަދު 500 މިލިއަން ޑޮލަރަށް ވުރެ މައްޗަށް އަރައެވެ. މިކަމުގެ ސަބަބުން ދައުލަތަށާއި ރައްޔިތުންނަށް ފޫނުބެއްދޭވަރުގެ ބޮޑެތި މާލީ ގެއްލުންތަކެއް ދަނީ ވަމުންނެވެ.

މި މައްސަލައަށް ދާއިމީ ހައްލެއް ހޯދުމުގެ ގޮތުން، ފަތުރުވެރިކަމަށް ދޫކޮށް ތަރައްގީނުކުރެވި ދިގުލައިގެން ގޮސްފައިވާ ރަށްތަކާއި ފަޅުތަކާމެދު ފިޔަވަޅު އެޅުމަށް ހާއްސަ ގަވާއިދެއް ސަރުކާރުން މިހާރު ވަނީ އެކުލަވާލާފައެވެ. މި ގަވާއިދުގެ ދަށުން، އެއްބަސްވުމާ އެއްގޮތަށް ތަރައްގީ ނުކުރާ ތަންތަނުގެ އެއްބަސްވުންތައް ބާތިލުކުރުމުގެ ހަރުދަނާ އުސޫލުތަކެއް ވަނީ ކަނޑައަޅާފައެވެ.