ގދ. އަތޮޅު ކޮޑެގަލާގައި ތަރައްގީކުރި "ނީލާ ކޮރަލް އައިލެންޑް މޯލްޑިވްސް" ރިސޯޓު ރަސްމީކޮށް ހުޅުވައިފިއެވެ.
"ވިޒިޓް މޯލްޑިވްސް އިޔާ 2027" އަށް ތައްޔާރުވަމުންދާ ދަނޑިވަޅެއްގައި ހުޅުވުނު މި ރިސޯޓާއެކު، ސަރަހައްދީ ވިޔަފާރިތަކަށާއި އާންމުންނަށް ވަޒީފާގެ އާ ފުރުސަތުތަކެއް ހުޅުވިގެންދާނެއެވެ.
މި ރިސޯޓަކީ އިޓަލީގެ މަޝްހޫރު ހޮސްޕިޓަލިޓީ ގްރޫޕެއް ކަމަށްވާ "ހޯލްޑިންގ ކަރިސްމާ" އިން ރާއްޖޭގައި ހުޅުވި ފުރަތަމަ ރިސޯޓެވެ. މިއީ ގާތްގަނޑަކަށް 40 މެހުމާނުންނަށް ހިދުމަތް ދެވޭގޮތަށް ފަރުމާކޮށްފައިވާ، 7 ޕްރައިވެޓް ވިލާ ހިމެނޭ ރިސޯޓެކެވެ.
Advertisement
މެހުމާނުންގެ ޕްރައިވަސީއަށް އިސްކަންދީގެން ފަރުމާކޮށްފައިވާ މި ރިސޯޓުން، ފުޅާ ދާއިރާއެއްގައި ކެއިންބުއިމުގެ ހިދުމަތްތަކާއި، ސްޕާ، ޑައިވިންގ އަދި މޫދު ކުޅިވަރުގެ ތަފާތު ހަރަކާތްތައް ފޯރުކޮށްދެއެވެ. އާންމު ބޮޑެތި ރިސޯޓުތަކާ ހިލާފަށް ކުޑަ އާބާދީއަކަށް އަމާޒުކޮށްފައިވާ މި ރިސޯޓަކީ، ހަމަހިމޭން އަދި އެކަހެރި މާހައުލެއް ހޯދަން އެދޭ ފަތުރުވެރިންނަށް ހާއްސަ މަންޒިލެކެވެ.
މި ރިސޯޓު ހުޅުވުމާއެކު ގދ. އަތޮޅުގެ އާންމު ރައްޔިތުންނަށް ވަޒީފާގެ ގިނަ ފުރުސަތުތަކެއް ލިބި، ފަތުރުވެރިކަމުގެ ނަފާ އަތޮޅުގެ އިގްތިސާދަށް ވަންނާނެކަމަށް މިނިސްޓްރީ އޮފް ޓޫރިޒަމް އެންޑް ސިވިލް އޭވިއޭޝަނުން ހާމަކުރެއެވެ. މީގެއިތުރުން، ރާއްޖެ ބައިނަލްއަގްވާމީ ފަތުރުވެރިކަމުގެ އެންމެ މަގްބޫލު މަންޒިލްގެ ގޮތުގައި އިޝްތިހާރުކުރުމަށް ރޭވިފައިވާ "ވިޒިޓް މޯލްޑިވްސް އިޔާ 2027" ކެމްޕޭނަށްވެސް މި ރިސޯޓާއެކު އިތުރު ފުރިހަމަކަމެއް ލިބިގެންދާނެއެވެ.
