މިއަހަރުގެ މިހާތަނަށް ގްރީން ޓެކުހުގެ ގޮތުގައި ދައުލަތަށް 1.5 ބިލިއަން ރުފިޔާ ލިބިފައިވާކަމަށް މާލީ ވުޒާރާގެ ތަފާސްހިސާބުތަކުން ދައްކައިފިއެވެ.
މާލީ ކަންކަމާއި ސަރުކާރުގެ ކުންފުނިތަކާ ބެހޭ ވުޒާރާއިން އާންމުކޮށްފައިވާ "ވީކްލީ ފިސްކަލް ޑިވެލޮޕްމަންޓް" ރިޕޯޓުގައިވާ ގޮތުން، ސެޕްޓެމްބަރު މަހުގެ 24 ވަނަ ދުވަހުގެ ނިޔަލަށް ލިބުނު މި އާމްދަނީއަކީ ވޭތުވެދިޔަ އަހަރުގެ މި މުއްދަތާ އަޅާބަލާއިރު 0.7 އިންސައްތައިގެ ކުރިއެރުމެކެވެ.
ދިވެހިރާއްޖޭގައި ގްރީން ޓެކްސް ނަގަން ފަށާފައިވަނީ 2016 ވަނަ އަހަރުގެ އޮކްޓޫބަރު މަހުގައެވެ. މި ޓެކްސް ތައާރަފުކުރުމުގެ މައިގަނޑު މަގުސަދަކީ ރާއްޖޭގެ ތިމާވެށި ރައްކާތެރިކުރުމަށާއި، ދެމެހެއްޓެނިވި ތަރައްގީގެ މުހިންމު މަޝްރޫއުތަކަށް ބޭނުންވާ ފައިސާ ހޯދުމެވެ.
Advertisement
މި ޓެކްސް ނެގެނީ ރާއްޖޭގައި ހިންގާ 180 ރިސޯޓާއި، 16 ހޮޓާ، 927 ގެސްޓްހައުސް އަދި 165 ސަފާރީ އުޅަނދަށް ޒިޔާރަތްކުރާ ފަތުރުވެރިންގެ އަތުންނެވެ. އެގޮތުން، ރިސޯޓުތަކާއި ސަފާރީ އަދި ހޮޓާތަކުގައި ޗުއްޓީ ހޭދަކުރާ ފަތުރުވެރިންގެ އަތުން ބޮލަކަށް 12 ޑޮލަރު ނަގާއިރު، ގެސްޓްހައުސްތަކުން ނަގަނީ 6 ޑޮލަރެވެ. ނަމަވެސް، އުމުރުން ދެ އަހަރު ނުފުރޭ ކުޑަކުދިން މި ޓެކުހުން އިސްތިސްނާވާނެއެވެ.
ގްރީން ޓެކުހުން ލިބޭ އާމްދަނީ ބޭނުންކޮށްގެން ސަރުކާރުން ވަނީ ރަށްރަށުގައި ތިމާވެއްޓާ ގުޅުންހުރި ގިނަގުނަ މަޝްރޫއުތަކެއް ހިންގާފައެވެ. އަދި ކުރިއަށް އޮތް ތަނުގައިވެސް މިފަދަ މަޝްރޫއުތައް އިތުރަށް ފުޅާކުރުމަށް ސަރުކާރުން ވަނީ ރާވާފައެވެ. އޭގެ ތެރޭގައި ރަށްރަށުގެ ފެނާއި ނަރުދަމާގެ ނިޒާމު ގާއިމުކުރުމާއި، ގޮނޑުދޮށް ހިމާޔަތްކުރުމުގެ އިތުރުން "ކްލީން އެންވަޔަރަންމަންޓް ޕްރޮޖެކްޓް" ފަދަ ތިމާވެށި ރައްކާތެރިކުރުމުގެ މުހިންމު މަޝްރޫއުތައް ހިމެނެއެވެ.
