ސަރުކާރުގެ "ހިޔާވެހި ސްކީމް"ގެ ދަށުން ލޯނު ދިނުމަށް ގައުމީ ބޭންކް، ބީއެމްްއެލްއާއެކު ހައުސިން މިނިސްޓްރީން އެއްބަސްވުމުގައި މިއަދު ސޮއިކޮށްފި އެވެ.
ހައުސިން މިނިސްޓްރީން ބުނީ "ހިޔާވެހި ފައިނޭންސިން ޕްރޮގްރާމް"ގެ ދަށުން ލޯނު ދޫކުރުމަށް އެ މިނިސްޓްރީ އާއި ބީއެމްއެލްއާ ދެމެދު މިއަދު އެއްބަސްވުމުގައި ސޮއިކޮށްފައިވާ ކަމަށެވެ.
މިނިސްޓްރީގައި ބޭއްވިި ރަސްމިއްޔާތެއްގައި އެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. އަބްދުالله މުއްތަލިބެވެ. އަދި ބީއެމްއެލްގެ ފަރާތުން ސޮއިކުރެއްވީ ސީއީއޯ މުހައްމަދު ޝަރީފެވެ.
އެ އެއްބަސްވުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެއް ކަމުގައިވާ ބޯހިޔާވެހިކަން ފަސް ޕަސެންޓް ޕްރޮފިޓް ރޭޓުގައި ބޭންކުތައް މެދުވެރިކޮށް މާލީ އެހީތެރިކަން ބޭނުންވާ މީހުންނަށް ފޯރުކޮށްދިނުމަށް ވެފައިވާ އެއްބަސްވުމެއް ކަމަށް މިނިސްޓްރީން ބުންޏެވެ.
އެ ރަސްމިއްޔާތުގައި މިނިސްޓަރު މުއްތަލިބް ވިދާޅުވީ އެ ސްކީމުގެ ދަށުން ލޯނަށް އެދި 2,256 މީހަކު ފޯމު ހުށަހަޅާފައިވާ ކަމަށެވެ.
ލޯނަށް އެދުނު މީހުންނަށް ލޯނު ދޫކުރުމުގެ މަސައްކަތް އަންނަ މަހު ފަށަން ވަނީ ނިންމައިފަ އެެވެ.
ބީއެމްއެލްގެ އިތުރުން މޯލްޑިވްސް އިސްލާމިކް ބޭންކް (އެމްއައިބީ) އާއި ހައުސިން ޑިވެލޮޕްމަންޓް ފައިނޭންސިން ކޯޕަރޭޝަން (އެޗްޑީއެފްސީ) މެދުވެރިކޮށް ވެސް މި ލޯނު ދިނުމަށް ސަރުކާރުން ވަނީ ނިންމައިފަ އެވެ.
