އައްޑޫ ލިންކް ރޯޑް މަރާމާތުކުރުމުގެ މަސައްކަތް އަންނަ ހަފްތާގައި ފެށުމަށް އައްޑޫ ސިޓީ ކައުންސިލުން ނިންމައިފިއެވެ. މިކަން އިއުލާނުކުރެއްވީ އައްޑޫ ސިޓީ ކައުންސިލުން މިއަދު ބޭއްވި ނޫސްވެރިންގެ ބައްދަލުވުމުގައި މޭޔަރު އަލީ ނިޒާރެވެ.

މޭޔަރު ވިދާޅުވި ގޮތުގައި ލިންކް ރޯޑުގައި ވަޅުގަނޑުތައް ހެދި، ބޮޑުތަނުން ހަލާކުވެފައިވާއިރު، މަރާމާތުކުރުމުގެ މަސައްކަތް މިހާތަނަށް ނުފެށި ލަސްވެފައިވަނީ އެކަމަށް ބޭނުންވާ ތާރު ނުލިބުމުގެ ސަބަބުންނެވެ. ނަމަވެސް މިހާރު ތާރު ލިބިފައިވާތީ، އަންނަ ހަފްތާގެ ތެރޭގައި މަރާމާތުގެ މަސައްކަތް ފެށޭނެ ކަމަށް އޭނާ ވިދާޅުވިއެވެ.

މަގުގެ މަރާމާތަށް 10 ޓަނުގެ ތާރު ހޯދުމަށް ކައުންސިލުން އެޕްރީލް މަހުގެ ތެރޭގައި ބީލަމަށް ހުޅުވާލާފައިވާކަން މޭޔަރު ފާހަގަކުރެއްވިއެވެ. އަދި މިހާތަނަށް ވެސް ކައުންސިލުން އެތައް ފަހަރެއްގެ މަތިން ލިންކް ރޯޑް މަރާމާތުކޮށްފައިވާ ކަމަށާއި، އެ މަސައްކަތްތައް ކުރަމުން އައީ ވަސީލަތްތަކުގެ ބޮޑެތި ދަތިތަކާ ކުރިމަތިލަމުން ކަމަށް ވެސް އޭނާ ވިދާޅުވިއެވެ.

ލިންކް ރޯޑް އެހާ ބޮޑަށް ހަލާކުވާން ދިމާވި މައިގަނޑު ސަބަބުތަކުގެ ތެރޭގައި ތާރު އަޅާފައި އޮތްލެއް ތުނިވުމާއި މަގުގެ ފެންވަރު ދަށްވުން ހިމެނޭ ކަމަށް ނިޒާރު ވިދާޅުވިއެވެ. އެހެންކަމުން، އެތައް ފަހަރެއްގެ މަތިން މަގުގެ ހަލާކުވެފައިވާ ތަންތަނަށް ޕެޗް އަޅައިގެން މަރާމާތުކޮށްފައިވާ ކަމަށް ވެސް ވަނީ ވިދާޅުވެފައެވެ.

މީގެ އިތުރުން، އައްޑޫ ލިންކް ރޯޑް އަލުން ތަރައްގީކުރުމުގެ މަޝްރޫއު ސަރުކާރުން މިހާރު ވަނީ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާ ހަވާލުކޮށްފައެވެ. މި މަޝްރޫއުގެ ދަށުން ޖުމްލަ 12.3 ކިލޯމީޓަރުގެ ސަރަހައްދެއް ތަރައްގީކުރެވޭނެއެވެ. އަދި އައްޑޫގެ މަގު ހެދުމުގެ މަޝްރޫއުގެ ތެރެއިން ސީޓީބީ އަޅާފައިވާ މަގުތަކުގައި ތާރު އެޅުމުގެ މަސައްކަތް ވެސް މި މަޝްރޫއުގެ ދަށުން ކުރިއަށް ގެންދާނެއެވެ. އެގޮތުން 67.58 ކިލޯމީޓަރުގައި ތާރު އެޅުމަށް ވަނީ ރޭވިފައެވެ.