ރާއްޖެއަށް މިހާރު ކުރަމުންދާ ހުޅަނގު މޫސުމުގެ ބާރުގަދަ ވިއްސާރައިގައި ދެކުނުގެ އަތޮޅުތަކަށް ބޮޑެތި ގެއްލުންތަކެއް ލިބެމުންދާއިރު، އެންމެ ނުރައްކާތެރި ހާލަތެއް އުފެދިފައިވަނީ އައްޑޫ ސިޓީއާއި ފުވައްމުލައް ސިޓީގައެވެ.

މޫސުމާ ބެހޭ ގައުމީ އިދާރާއިން (މެޓު އޮފީސް) މުޅި ރާއްޖެއަށް ކުރިއަށް އޮތް ބުދަ ދުވަހާ ހަމައަށް ވިއްސާރަކުރާނެ ކަމަށް ލަފާކޮށްފައިވާއިރު، ގއ. އާއި ގދ. އަދި ދެކުނުގެ ސިޓީތަކަށް ބޯކޮށް ވާރޭވެހި އެކިވަރުގެ ގެއްލުންތައް ލިބެމުންދާ ކަމަށް މައުލޫމާތު ލިބެއެވެ. މިގޮތުން ކުރިއަށް އޮތް 24 ގަޑިއިރުވެސް މޫސުން ގޯސްވާނެތީ، ދަތުރުފަތުރު ކުރުމުގައާއި ފެންބޮޑުވުމުގެ ސަބަބުން ލިބިދާނެ ގެއްލުންތަކުން ރައްކާތެރިވުމަށް ކަމާބެހޭ އިދާރާތަކުން ވަނީ ހާއްސަ ސަމާލުކަމެއް ދިނުމަށް އިލްތިމާސްކޮށްފައެވެ.

އައްޑޫ ސިޓީގެ ފޭދޫގައި ފެންބޮޑުވެގެން ބޮޑެތި ގެއްލުންތަކެއް ވެފައިވާކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ވަނީ ހާމަކުރައްވާފައެވެ. ވޭތުވެދިޔަ 2 ދުވަހުގެ ތެރޭގައި ފޭދޫގެ 70 އަށްވުރެ ގިނަ ގެއަކަށް އެކިވަރުގެ ގެއްލުންތައް ލިބިގެން ރިޕޯޓުކޮށްފައިވާއިރު، މިއަދުގެ މިހާތަނަށް އެކަނިވެސް 9 ގެއަކަށް ފެންވަދެގެން ރިޕޯޓުކޮށްފަވާކަމުގައި އެ އިދާރާއިން ހާމަކުރިއެވެ. މީގެ ތެރެއިން 01 ގެއެއްގައި ދިރިނޫޅެވޭވަރަށް ފެންބޮޑުވެ، ޒަރޫރީ ބޭނުންތަކަށް ހުރަސްއެޅުމުގެ ސަބަބުން އެގޭގައި ދިރިއުޅޭ 8 މީހުންގެ އާއިލާއަށް ވަނީ ވަގުތީ ބޯހިޔާވަހިކަމާއި ކެއިންބުއިމުގެ ހިދުމަތް 3 ދުވަހުގެ މުއްދަތަށް ފޯރުކޮށްދީފައެވެ. މީގެއިތުރުން ކައްކައި ކައިބޮއި ހެދުމަށް ދަތިވި އެހެން 3 ގެއަކަށްވެސް 3 ދުވަހުގެ ކެއިންބުއިން ހަމަޖައްސައިދީފައިވާއިރު، ސ. މަރަދޫގެ 2 ގެއަކަށް ފެންވަދެގެންވެސް ވަނީ ރިޕޯޓުކޮށްފައެވެ.

ފޭދޫގެ އިތުރުން ޏ. ފުވައްމުލަކަށްވެސް ބޯކޮށް ވާރޭވެހި ފެންބޮޑުވުމުގެ ސަބަބުން ބައެއް ގޭގޭގެ ފާހާނާ ހޮޅިތައް ބެދިގެން ރިޕޯޓުކޮށްފައިވާކަމަށް ވަނީ އެނގިފައެވެ. މި ހާދިސާތަކާ ގުޅިގެން ހާލުގައި ޖެހިފައިވާ އާއިލާތަކަށް ބޭނުންވާ އެހީތެރިކަން ފޯރުކޮށްދިނުމުގެ މަސައްކަތް، އެރަށުގެ ފެނަކަ އޮފީހާއި، ކައުންސިލް އަދި އެހެނިހެން މުއައްސަސާތައް ގުޅިގެން މިހާރު ދަނީ ހުއްޓުމެއްނެތި ކުރަމުންނެވެ.