މުޅި މާލެ އާއި ހުޅުމާލެއިން ކަރަންޓް އެއްފަހަރާ އެކީއެކަށް ކެނޑިގެން ދިޔަ މައްސަލަ ސީރިއަސް މައްސަލައެއްގެ ގޮތުގައި ތަޙްޤީޤު ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަންގަވާފައިވާއިރު، ސްޓެލްކޯއިން މިއަދު އެންމެ ފުރަތަމަ ވެސް ވަނީ ކަރަންޓް ކެނޑުނީ ޓެކްނިކަލް މައްސަލައަކުން ކަމަށާއި އެކަމާއި މަޢާފަށް އެދޭ ކަމަށް ބުނެފައެވެ. އަދި މައްސަލަ ދެނަގަނެ ހައްލު ކުރުމުގެ މަސައްކަތްތައް ދަނީ ކުރެވެމުން ކަމަށް ބުންޏެވެ.
އޭގެ ގަޑިއެއްހާއިރު ފަހުން ސްޓެލްކޯއިން ބުނީ ގްރޭޓާމާލެ ގުރިޑް އަލުން އެނަރޖައިޒް ކުރުމުގެ ކުރިން ފުރިހަމަ ކުރަންޖެހޭ ޗެކްއަޕްތައް ދަނީ ފުރިހަމަ ކުރެވެމުން ކަމަށާއި މި ޗެކަޕްތައް ނިމުނުހާ އަވަހަކަށް މާލެއާއި، ހުޅުމާލޭގެ ޖަނަރޭޓަރުސެޓްތައް އެނަރޖައިޒް ކުރުމުގެ މަސައްކަތްތައް ކުރިއަށްދާނެ ކަމަށެވެ.
ކަރަންޓް ކެނޑުނުތާ 3 ގަޑިއިރުފަހުން ހުޅުމާލޭގެ އިންޖީނުގެއަށް ދިމާވި މައްސަލަ ވަނީ ހައްލުވެފައި ކަމަށް ސްޓެލްކޯއިން ބުންޏެވެ.
ހަމަ އެއާއެކު މީގެ އިރުކޮޅެއް ކުރިން މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް ޠާރިޤް އިބްރާހީމް ވިދާޅުވީ މާލެ، ހުޅުމާލެ އަދި ހުޅުލެ އިން ކަރަންޓު ކެނޑުމާއި ގުޅިގެން ކަރަންޓުގެ ޚިދުމަތް އަނބުރާ ދިނުމަށް ކުރަންޖެހޭ ހުރިހާ މަސައްކަތެއް މިދަނީ ކުރަމުން ކަމަށާއި އަދި ދިމާވި މައްސަލަ ދިރާސާކޮށް ބަލައި ކުރިއަށްއޮތްތަނުގައި މިފަދަ މައްސަލަތައް ދިމާނުވާނެގޮތަށް އިންތިޒާމްތައް ހަމަޖެއްސުމަށް ކުރަންޖެހޭ މަސައްކަތްތައް މިދަނީ ކުރަމުންނެވެ.
މި ހުރިހާ ކަމެއް ހިނގަމުން ދިޔައިރުވެސް އެންމެ އަމާންކަމާއި އޮމާންކަމާއެކު އޮތީ ރާއްޖޭގެ މައި ދޮރާށި ކަމަށްވާ ވެލާނާ އިންޓަރނޭޝަނަލް އެއާޕޯޓެވެ. މުޅި ގްރޭޓާ މާލޭގެ ކަރަންޓް ގްރިޑް އެކީއެކަށް ފެއިލްވެ “ބްރެއިން ފެއިލްވިއިރު” ވެސް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ އެއްވެސް އޮޕަރޭޝަނަކަށް ބުރުލެއް އެރިޔަ ނުދީ، ހުރިހާ ޚިދުމަތެއް ބަރާބަރަށް ފޯރުކޮށްދިންކަން ފާހަގަ ކުރެވެއެވެ. އެއާޕޯޓުގެ ޓްރެފިކް ކޮންޓުރޯލަށް މައްސަލައެއް ދިމާވިޔަނުދީ، ފުލައިޓުތައް ކެންސަލްވިޔަނުދީ ޕަސެންޖަރުންނަށް ދޭންޖެހޭ ހުރިހާ ޚިދުމަތެއް އެއާޕޯޓުން ދިޔައީ ދެމުންނެވެ. ނަމަވެސް، ސްޓެލްކޯއަށް ކުޑަމިނުން ކައުންޓަރުން ފޯރުކޮށްދޭންޖެހޭ ޚިދުމަތްތައްވެސް ފޯރުކޮށެއް ނުދެވުނުކަން ސޯޝަލްމީޑިއާގައި ރައްޔިތުން ދަނީ ބުނަމުންނެވެ.
ފަހަކަށް އައިސް ސްޓެލްކޯ އާއި ދޭތެރޭ އޮންނަ އިތުބާރު ރައްޔިތުންގެ ކުރިމަތީގައި ގެއްލެމުންދާ ކަމަށް ބައެއް ފަރާތްތަކުން ދަނީ ބުނަމުންނެވެ. ނަމަވެސް ފަހުމީގެ އެމްޑީ ކަމުގައި ހިންގަމުންދާ ސްޓެލްކޯ އިން ވަނީ އެކްސް ޕްލެޓްފޯމުގައި 3 ގަޑިއިރުތެރޭ 6 ފަހަރުމަތިން މިއަދު އަޕްޑޭޓް ގެނެސްދެއްވާފައިކަން ފާހަގަ ކުރެވެއެވެ.
ސްޓެލްކޯއިން ބުނީ މިއަދު އިރުއޮއްސެންވާއިރަށް ހުރިހާ ތަނަކަށް އަލުން ކަރަންޓް ދެވޭނެއެވެ.
