ޖަލު ބަންދު ފިޔަވައި ކަނޑައެޅޭ އިތުރު އަދަބުތައް ތަންފީޛު ކުރުމަށް މޯލްޑިވްސް ކަރެކްޝަނަލް ސަރވިސް (އެމްސީއެސް)އާއި އައްޑޫ ސިޓީ ކައުންސިލާ ދެމެދު ފަހުމުނާމާއެއްގައި މިއަދު އައްޑޫ ސިޓީ ކައުންސިލްގެ އިދާރާގައި ބޭއްވުނު ރަސްމިއްޔާތެއްގައި ސޮއިކޮށްފިއެވެ.
މި ފަހުމުނާމާއަކީ ދިވެހިރާއްޖޭގެ ޤާނޫނުލްއުޤޫބާތުގެ 1005 ވަނަ މާއްދާގައިވާ "ތަފާތު އަދަބު އެއްހަމަ ކުރާ ތާވަލު" އާ އެއްގޮތްވާ ގޮތުގެމަތިން، ޖަލު ބަންދު ފިޔަވައި ކަނޑައެޅޭ އަދަބުތައް ތަންފީޛުކުރުމުގައި އެމްސީއެސްއަށް އައްޑޫ ސިޓީ ކައުންސިލުން އެހީތެރިކަން ފޯރުކޮށްދިނުމާ ގުޅޭގޮތުން އެކުލަވާލެވުނު އެއްބަސްވުމެކެވެ.
މި ފަހުމުނާމާގެ ދަށުން، ކޯޓުތަކުން ކަނޑައަޅާ އަދަބުގެ ބާވަތާއި ގުޅިގެން ޤައިދީން ތަޢުލީމީ ނުވަތަ އެހެނިހެން ޕްރޮގްރާމްތަކުގައި ބައިވެރިކުރުމަށް އަމުރުކުރާ ޙާލަތްތަކުގައި، އައްޑޫ ސިޓީ ކައުންސިލުން އެމްސީއެސްއަށް އެހީތެރިކަން ފޯރުކޮށްދޭނެއެވެ. އަދި މުޖުތަމަޢަށް ޚިދުމަތްކުރުމުގެ ގޮތުން ކުރެވިދާނެ މަސައްކަތްތައް ދެނެގަނެ، އެކަންކަން ހަމަޖެއްސުމުގައިވެސް ކައުންސިލުން އެހީތެރިވެދޭނެއެވެ.
މީގެއިތުރުން، ޤައިދީން މުޖުތަމަޢުން ބަލައިގަންނަ ފަރާތްތަކެއްގެ ގޮތުގައި ހެދުމަށާއި، މުޖުތަމަޢަށް އަލުން ގުޅިގެން ދިއުމަށްޓަކައި މުޖުތަމަޢުގެ ދައުރު ބަޔާންކޮށްދީ، އާންމުން ހޭލުންތެރި ކުރުމަށް އެމްސީއެސްއަށް ބޭނުންވާ އެހީތެރިކަންވެސް އައްޑޫ ސިޓީ ކައުންސިލުން ފޯރުކޮށްދޭނެއެވެ.
މި ފަހުމުނާމާގައި އެމްސީއެސްގެ ފަރާތުން ސޮއިކުރެއްވީ ކޮމިޝަނަރ އޮފް ޕްރިޒަންސް ޙަސަން ޒަރީރެވެ. އަދި އައްޑޫ ސިޓީ ކައުންސިލްގެ ފަރާތުން ސޮއިކުރެއްވީ އައްޑޫ ސިޓީގެ މޭޔަރ ޢަލީ ނިޒާރެވެ.
މި ފަހުމުނާމާގެ ސަބަބުން، އައްޑޫ ސިޓީގައި ޖަލު ބަންދު ފިޔަވައި ކަނޑައެޅޭ އަދަބުތައް ތަންފީޛުކުރުމުގައި އިތުރު ފުރިހަމަކަމެއް ލިބި، ޤައިދީން އިޞްލާޙުވެ މުޖުތަމަޢަށް އަނބުރާ ގުޅުމަށް މަގުފަހިވެގެންދާނެއެވެ.
