މާލެ އާއި ރާއްޖޭގެ އެކި ކަންކޮޅުތަކުން އެތައް ހާސް ރައްޔިތުން ހައުސިންގ ލޯނަށް އެދި ހުށަހަޅަން ފަށައިފި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ޢިއްޒުއްދީން ފާލަން އަލުން ތަރައްޤީކޮށް އިފްތިތާޙުކުރުމުގެ ރަސްމިއްޔާތުގައި ރައީސް ވިދާޅުވީ ރައްޔިތުންނަށް ބޯހިޔާވަހިކަން ފޯރުކޮށްދިނުމުގެ އެންމެ މުހިންމު ވަސީލަތަކީ އިސްލާމިކް ފައިނޭންސް ލޯން ސްކީމް ކަމަށެވެ. އެގޮތުން 5% ގެ އިސްލާމިކް ފައިނޭންސް ލޯން ސްކީމަށް މިހާރު ވެސް މާލެ އާއި ރާއްޖޭގެ އެކި ކަންކޮޅުތަކުން އެތައް ހާސް ރައްޔިތުން ހުށަހަޅަމުންދާ ކަމަށާއި، އަދި މި އަހަރުގެ މެދުތެރޭގައި ހައުސިންގ ލޯނު ދޫކުރަން ފެށޭނެ ކަމަށެވެ.

މާލޭގެ ރައްޔިތުންގެ ތެރެއިން ގޯތި އޮތް މީހުންނަށް އެންމެ ބޮޑު އެހީތެރިކަމެއް ލިބޭނީ މި ލޯނު ސްކީމުން ކަމަށް ރައީސް ވިދާޅުވިއެވެ. މިއީ ގޯތީގައި ގެ އެޅުމަށް ނުވަތަ އަޅަން ފަށައި ނުނިމިހުރި ގެ ނިންމުމަށް ބޭނުންކުރެވޭނެ ލުއި ލޯނު ސްކީމެއް ކަމަށް ވިދާޅުވިއެވެ. އިމާރާތްކުރާ ތަން ރަހުނުކޮށް އަދި އިކުއިޓީ ނުބަހައްޓައި، ވަރަށް ލުއި ޝަރުތުތަކެއްގެ ދަށުން މި ލޯނު ނެގޭނެ ކަމަށް ރައީސް ވިދާޅުވިއެވެ.

މާލޭގައި 10 މިލިއަން ރުފިޔާ އާއި ހަމައަށް ލޯނު ނެގޭނެ ކަމަށާއި، ޖުމްލަކޮށް 6 މިލިއަން ރުފިޔާ މާލެ ސަރަހައްދުގައި ލޯނު ނެގޭނެ ކަމަށް ރައީސް ވިދާޅުވިއެވެ. ހައުސިންގ ލޯނު ދޫކުރުމަށް މި އަހަރަށް 1 ބިލިއަން ރުފިޔާ ކަނޑައަޅާފައިވާ ކަމަށާއި، އޭގެ ތެރެއިން ގިނަ ރައްޔިތުން މި އަހަރު ލޯނު ނަގައިގެން އަމިއްލަ ގެ އަޅަން ފަށާނެ ކަމަށް އުއްމީދުކުރައްވާ ކަމަށް ވެސް ރައީސް ވިދާޅުވިއެވެ.

މީގެ އިތުރުން، ސަރުކާރުން މާލޭގައި ވެސް ހައުސިންގ މަޝްރޫޢުތަކެއް ހިންގަން ނިންމާފައިވާ ކަމަށް ރައީސް ވިދާޅުވިއެވެ. މާލެ، ވިލިމާލެ އަދި ގުޅީފަޅުގައި މި އަހަރު ތެރޭގައި ގެދޮރުވެރިކަމުގެ މަޝްރޫޢުތަކެއް ފެށިގެންދާނެ ކަމަށާއި، މި މަޝްރޫޢުތަކާއެކު މާލެ، ވިލިމާލެ އަދި ހުޅުމާލެއިން ސޯޝަލް ހައުސިންގ ޔުނިޓްތައް ފޯރުކޮށްދިނުމަށް މަގުފަހިވެގެންދާނެ ކަމަށް ވެސް ރައީސް ވިދާޅުވިއެވެ.