ލަންކާ ޓޫރިޒަމް ފުޅާވެ ރާއްޖެއަށް ނުބައި އަސަރެއް ކޮށްފާނެ ކަމަށް ބެލެވޭ ދަނޑިވަޅުގައި ރާއްޖެއިން ޕާކިސްތާނު މާކެޓަށް ވަންނަން ނިންމައިފިއެވެ.
ޕާކިސްތާނުގެ ހައި ކޮމިޝަނަރު އެކްސެލެންސީ ވައިސް އެޑްމިރަލް (ރިޓަޔަރޑް) ފައިސަލް ރަސޫލް ލޯދީ، ރާއްޖޭގެ ލީޑިންގ ޓްރެވެލް އެޖެންސީ، ރިސޯޓް ލައިފް ޓްރެވެލް (އާރްއެލްޓީ)ގެ ސީއީއޯ މުޙައްމަދު ޝާޒް ވަލީދާއެކު ބޭއްވި ބައްދަލުކުރެއްވުމަށްފަހު ކުރެއްވި އެކްސްގައި ވާގޮތުން ޕާކިސްތާނުގެ އެންމެ ބޮޑު ޓްރެވަލް ޓްރޭޑް ޝޯ، ޕާކިސްތާން ޓްރެވަލް މާކެޓް 2025 ގައި ރާއްޖެއިން ބައިވެރިވާނެއެވެ. މިމަހު 31 އިން ފެބްރުއަރީ 2 އަށް ކަރާޗީގެ އެކްސްޕޯ ސެންޓަރުގައި ކުރިޔަށްދާ މި ޝޯގައި ދިވެހިރާއްޖޭގެ މަޝްހޫރު ލަގްޒަރީ ފަތުރުވެރިކަން ޕާކިސްތާނުގެ ފުޅާވަމުންދާ ޓްރެވަލް މާކެޓަށް ފުރަތަމަ ފަހަރަށް ދައްކާލެވޭނެއެވެ.
އާރްއެލްޓީގެ މެނޭޖިންގ ޑިރެކްޓަރ ޝާޒް ވިދާޅުވި ގޮތުގައި، އެޖެންސީގެ މަޤްޞަދަކީ ޕާކިސްތާނާއި ދިވެހިރާއްޖެއާ ދެމެދު ހަފްތާއަކު ދެ ޗާޓަރ ފްލައިޓް ފެށުމެވެ.
"އަވަށްޓެރި ޤައުމުތަކުގެ މާކެޓަށް އަންނަ ބަދަލުގެ ސަބަބުން ދުރާލައި ރާއްޖެއިން އެކްޝަން ނުނަގައިފިނަމަ ރާއްޖޭގެ ޓުއަރިޒަމަށް ލޮޅުމެއް އައިސްދާނެ. އެހެންވީމަ ދުރާލާ އެބަޖެހޭ އިތުރުނމާކެޓްތައް ހޯދަން. އަޅުގަނޑުމެންގެ އަމާޒަކީ ޕާކިސްތާނުން ހަފްތާއަކު މަދުވެގެން ރާއްޖެއަށް ދެ ފުލައިޓް ގެނައުން" ޝާޒް ވިދާޅުވިއެވެ.
ޝާޒް ވިދާޅުވީ ރާއްޖޭގެ ދުރު އަތޮޅުތަކުގައި ތިބި ރިސޯޓުތަކަށް ބޭރުގެ އެޖެންސީތަކުން ޓޫރިސްޓުން ފޮނުވާ މިންވަރަށް ބަދަލު އައިސްފިނކަމަށާއި، އަސްލު ސަބަބަކީ ފުލައިޓްތަކުން ނަގާ ޓެކްސް ބޮޑު ކުރުމެވެ. އެކަމަށް އޮތް އެންމެ ރަނގަޅު ހައްލަކީ މާލެ ކައިރީގައިވާ ރިސޯޓުތަކުން ނަގާ ޓެކްސް ބޮޑުކުރުމަށްފަހު ދުރު އަތޮޅުތަކުގެ ރިސޯޓުތަކުން ނަގާ ޓެކްސް ކުޑަކޮށްލުމެވެ. އޭރުން ރާއްޖެ އަންނަ ފަތުރޔވެރިންގެ ޢަދަދު ވަރަށް ބޮޑަށް އިތުރުވެގެންދާނެ ކަމަށް ބެލެވޭ ކަމަށް 13 ޑެސްޓިނޭޝަނަށް މިހާރު ވެސް ދަތުރު ރާވައިދޭ ޝާޒް ވިދާޅުވިއެވެ.
"ރާއްޖެއިން މުޅިން އަލަށް މި އެގްޒިބިޝަންގައި ބައިވެރިވަނީ. އެނގިލައްވާނެ 240 މިލިއަނަށްވުރެ ގިނަ މީހުން އުޅޭ ޕާކިސްތާނަކީ ވަރުގަދަ ޓްރެވަލް އިންޑަސްޓްރީއެއް އޮތް ޤައުމެއް. އަހަރަކު 2 ބިލިއަން ޑޮލަރަށްވުރެ ގިނަ ފައިސާ ޕާކިސްތާނު މީހުން ޗުއްޓީތަކަށް އެކި ޤައުމުތަކަށް އެބަ ޚަރަދުކުރޭ. އެމީހުން ޢާންމުކޮށް ދަނީ ޔޫއޭއީ، ސައޫދީ އަރަބިއްޔާ، ތުރުކީ އަދި މެލޭޝިއާ އަށް. އެހެންވީމަ ރާއްޖެއިން އެބަޖެހޭ މި މާކެޓަށް ވަންނަން. މި ނަގަނީ ރިސްކެއް" ޝާޒް ވިދާޅުވިއެވެ.
ޕާކިސްތާނުގެ މެދު އަދި މަތީ ފަންތީގެ މީހުންނަށް އަމާޒުކޮށް، ޓޫރިޒަމް ސިނާޢަތުގައި ޙަރަކާތްތެރިވާ އެކިއެކި ފަރާތްތަކުން ތަފާތު ޕެކޭޖްތަކެއް ވަމީ ތައްޔާރު ކޮށްފައެވެ.
ކަރާޗީގެ އެކްސްޕޯ ސެންޓަރުގައި ކުރިޔަށްދާ މި ފެއާގައި ރާއްޖޭގެ ޓޫރިޒަމް ޕްރޮމޯޓް ކުރުމަށް ޕާކިސްތާނުގެ ސެލިބްރިޓީންގެ އެހީތެރިކަން ރާއްޖޭގެ އާރްއެލްޓީއަށް ލިބިގެންދާނެ ކަމަށް ރާއްޖޭގައި ހުންނަ ޕާކިސްތާން އެމްބަސީން ބުނެއެވެ.
އިތުރަށް ކިޔާލުމަށް:
