ފެނަކަ ކޯޕަރޭޝަން ލިމިޓެޑްގެ ކުރީގެ މެނޭޖިންގ ޑިރެކްޓަރު އަޙްމަދު ސަޢީދު މުޙައްމަދާއި އެ ކުންފުނީގެ އޭރުގެ އިސް މުވައްޒަފެއްގެ މައްޗަށް ޕްރޮސެކިއުޓަރ ޖެނެރަލްގެ އޮފީހުން މިއަދު ކްރިމިނަލް ކޯޓަށް ދަޢުވާ ހުށަހަޅައިފިއެވެ.

މި ދަޢުވާ އުފުލާފައިވަނީ 2018 ވަނަ އަހަރު ފެނަކަ ކޯޕަރޭޝަން ލިމިޓެޑާއި ބްލޭޒަން އިންކް ޕްރައިވެޓް ލިމިޓެޑާ ދެމެދު ވެފައިވާ އެއްބަސްވުމެއްގެ ދަށުން ކުރަން ހަވާލުކުރި މަސައްކަތެއް ފުރިހަމަ ކޮށްފައިނުވަނީސް، އަދި މަސައްކަތް ނިންމިކަން ކަށަވަރުކުރުމެއް ނެތި، އެ މަސައްކަތަށްވާ ފައިސާ ބްލޭޒަން އިންކް ޕްރައިވެޓް ލިމިޓެޑަށް ދޫކުރި މައްސަލައާ ގުޅިގެންނެވެ.

ޕްރޮސެކިއުޓަރ ޖެނެރަލްގެ އޮފީހުން މަޢުލޫމާތު ދިން ގޮތުގައި، މި މައްސަލާގައި ދަޢުވާ އުފުލާފައިވަނީ ފެނަކަ ކޯޕަރޭޝަން ޕްރައިވެޓް ލިމިޓެޑްގެ އޭރުގެ މެނޭޖިންގ ޑިރެކްޓަރ ޏ. ފުވައްމުލައް، ހޯދަޑު، މައިޒާން، އަޙްމަދު ސަޢީދު މުޙައްމަދާއި، އެ ކުންފުނީގެ އޭރުގެ ޕްރޮކިއުމަންޓް ހެޑް ޏ. ފުވައްމުލައް، ހޯދަޑު، މަރްޔަމް ދީނާ ޞާލިޙުގެ މައްޗަށެވެ.

ސަޢީދާއި ދީނާގެ މައްޗަށް އުފުލާފައިވަނީ ޤާނޫނުލްޢުޤޫބާތުގެ ދަށުން، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދަޢުވާއެވެ. މި ކުށް ސާބިތުވެއްޖެނަމަ އެ ދެމީހުންގެ މައްޗަށްވެސް 1 އަހަރާއި 7 މަހާއި 6 ދުވަހުގެ ޖަލު ޙުކުމެއް އަންނާނެ ކަމަށް ޕްރޮސެކިއުޓަރ ޖެނެރަލްގެ އޮފީހުން ހާމަކުރިއެވެ.

އެގޮތުން، މި މައްސަލައިގައި ސަޢީދުގެ މައްޗަށް ތުހުމަތުކޮށްފައިވަނީ ބްލޭޒަން އިންކް ޕްރައިވެޓް ލިމިޓެޑަށް ނާޖާއިޒު މަންފާ ހޯދައިދިން ކަމަށެވެ. އަދި މި ޢަމަލުގެ ސަބަބުން ފެނަކަ ކޯޕަރޭޝަނަށް 848,000 ރުފިޔާގެ ގެއްލުން ލިބިފައިވާކަން ސާބިތުވާކަމަށް ޕްރޮސެކިއުޓަރ ޖެނެރަލްގެ އޮފީހުން ބުންޏެވެ.