ރަތު ކަނޑުގައި ހިންގި އޮޕަރޭޝަނެއްގައި އިސްރާއީލުގެ އުޅަނދެއް ހިފަހައްޓައި، އެ އުޅަނދު ޔަމަނުގެ އައްސޭރިއަށް ގެންގޮސްފައިވާ ކަމަށް ބުނެ ހޫޘީން ބަޔާނެއް ނެރެފިއެވެ. “މި އޮޕަރޭޝަން ހިންގާފައިވަނީ ޔަމަނުގެ އާންމު މުޤާވަމަތު ހަރަކާތް އަންސާރުﷲގެ ލީޑަރު އަބްދުލްމަލިކް އަލް-ހޫޘީގެ އިރުޝާދުގެ ދަށުން، އަނިޔާވެރި ހަނގުރާމައަކާއި ބްލޮކޭޑަކަށް ކުރިމަތިލާންޖެހިފައިވާ ފަލަސްތީނުގެ ރައްޔިތުންނަށް އެހީތެރިވުމުގެ ގޮތުން" ކަމަށް ބަޔާނުގައި ވެއެވެ. ނަމަވެސް ބޯޓުގެ ނަމެއް ބުނެފައެއް ނެތެވެ.

އަނެއްކޮޅުން އިއްޔެ ތުރުކިއޭގެ ފޮރިން އެފެއާޒް މިނިސްޓްރީން އިއުލާންކޮށްފައިވާ ގޮތުގައި ތުރުކީގެ ކުންފުންޏެއްގެ މުދާ އުފުލާ ބޯޓަކަށް ޔަމަނުގެ އައްސޭރިފަށުގައި ހޫތީން ދިން މިސައިލް ހަމަލާއެއް ވަނީ އަމާޒުކޮށްފަ އެވެ.

ވެސެލް ޓްރެކަރ ވެބްސައިޓް މެރިނެޓްރެފިކް އިން ދައްކާ ގޮތުގައި ހަމަލާ އަމާޒުވި ތުރްކިއޭގެ ބޯޓު އެންމެ ފަހުން ރަތް ކަނޑުގައި ފެނިފައިވަނީ މީގެ ގާތްގަނޑަކަށް ފަސް ދުވަސް ކުރިންނެވެ.

^{ޔަމަނުގެ ހޫޘީން ޙަމަލާދިން ތުރްކިއޭގެ ބޯޓު އެންމެ ފަހުން ޓްރެކް ކުރެވުނު ކަމަށް ބުނެފައިވާ މެޕްގެ ސްކްރީން ޝޮޓް / ފޮޓޯ: އޭ އެޖެންސީ}

ބައެއް ޚަބަރުތައް ބުނާ ގޮތުގައިނތުރްކިއޭގެ ކުރީގެ ޕާލަމެންޓް މެމްބަރެއްގެ ބޯޓެއް ކަމަށްވާ އޯރިއޯން އެސް އިސްރާއީލަށް މުދާ ގެންދާކަމަށް ތުހުމަތު ކުރެވެއެވެ. ތުރްކިއޭ ސަރުކާރުން ވަނީ އިސްރާއީލާއި ހުރިހާ ގުޅުމެއް ކަނޑާލާފައެވެ. ބުނެވޭ ގޮތުގައި ހަމަލާ އަމާޒުވި ބޯޓަކީ އޯރިއޯން އެސް އެވެ.

ޔަމަނުގެ ހަނގުރާމަވެރިން ވަނީ އިސްރާއީލުގެ އަމާޒުތަކަށް ސަތޭކަ އަށްވުރެ ގިނަ ހަމަލާތައް ދީފައެވެ. މީގެ އިތުރުން އިސްރާއީލުގެ އުޅަނދުތަކާއި، އެ ސަރަޙައްދަށް ދަތުރުކުރާ އުޅަނދުތަކަށްވެސް ދަނި ހަމަލާދެމުންދެއެވެ. މިއީ އިސްރާއީލަށް އިޤްތިޞާދީ ގޮތުން ފިއްތުންތަކެއް ކުރިމަތިކުރުވުމަށް ކުރާ މަސައްކަތްތަކެކެވެ.

މީގެއިތުރުން ޔަމަނުގެ ހަނގުރާމަވެރިން އިސްރާއީލުގެ އުޅަނދުތަކަށާއި، އިސްރާއީލާ މުޢާމަލާތްކުރާ އުޅަނދުތަކަށް ވެސް ދަނީ އިންޒާރު ދެމުންނެވެ. އަދި މި ފަދަ އުޅަނދުތަކަކީ އެ ޤައުމުގެ ހަނގުރާމަވެރިންގެ ޝަރުޢީ އަމާޒުތަކަކަށް ވެގެންދާނެ ކަމަށް ބުނެފައިވެއެވެ. އަދި ރަތު ކަނޑުގައި މަސައްކަތްކުރާ އެހެން ޤައުމުތަކުގެ ރައްޔިތުންނަށް އިސްރާއީލުގެ އުޅަނދުތަކާ ގުޅުން ބޭއްވުމުން ދުރުހެލިވުމަށް ވެސް ބަޔާނުގައި އިލްތިމާސްކޮށްފައިވެއެވެ.

ޔަމަނުގެ ހަނގުރާމަވެރިން ބުނެފައިވަނީ، ސަރަޙައްދުގެ ސަލާމަތާއި ރައްކާތެރިކަމަށް ނުރައްކާވަނީ އިސްރާއީލުން ކަމަށެވެ. އަދި ބައިނަލްއަޤްވާމީ މުޖުތަމަޢުއިން ސަރަޙައްދުގެ ސަލާމަތާއި ރައްކާތެރިކަމަށް އަހަންމިއްޔަތުކަން ދޭނަމަ، އިސްރާއީލުން ޣައްޒާއަށް ދެމުންދާ ހަމަލާތައް ހުއްޓުވަން މަސައްކަތްކުރަންވާނެ ކަމަށްވެސް ބުނެފައިވެއެވެ.