ހުޅަނގު އައްސޭރީގައި ޔަހޫދީ ސިފައިންނަށް ޙަމަލާދެމުންދާތީ ނަތަންޔާހޫގެ ޕާޓީގެ ހުރިހާ ޙަރަކާތެއް ހުއްޓާލައިފި

ފަލަސްޠީނުގެ ހުޅަނގު އައްސޭރީގެ ޚަލީލް ސިޓީގެ އުތުރު ބޯޑަރުގައިވާ "ފަރްޝް އަލް-ހަވާ" އަސްކަރީ ޗެކްޕޮއިންޓަށް މިއަދު ދިން ވަރުގަދަ ފިދާއީ ހަމަލާއާ ގުޅިގެން އިސްރާއީލުގެ ސިޔާސީ މަސްރަޙަށް ބޮޑު ސިހުމެއް ލިބިއްޖެވެ. އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ މިއަދުގެ ވަގުތެއްގައި ކުއްލި އަމުރެއް ނެރެ، އޭނާ ނިސްބަތްވާ ވެރިކަންކުރާ ލިކޫޑް ޕާޓީން މިއަދަށް ރާވާފައި ހުރި ހުރިހާ ސިޔާސީ އެއްވުންތަކާއި، ކެމްޕޭން ހަރަކާތްތަކެއް މުއްދަތެއް ނެތް ގޮތަށް ބަންދުކޮށް، ކެންސަލްކުރުމަށް އަންގާފައެވެ.

މި ހަމަލާއަށް ފަލަސްޠީނުގެ މިނިވަންކަމަށް މަސައްކަތްކުރާ މަޝްހޫރު ޖަމާޢަތެއް ކަމަށްވާ "ޕޮޕިއުލަރ ފްރަންޓް ފޯ ދަ ލިބަރޭޝަން އޮފް ޕަލެސްޓީން" އިން ވަނީ ރަސްމީކޮށް މަރުޙަބާ ކިޔާފައެވެ. އެ ޖަމާޢަތުގެ މަރުކަޒީ މީޑިއާއިން މިއަދު ނެރުނު ބަޔާނެއްގައި ބުނެފައިވަނީ، ޚަލީލް ސިޓީއަކީ އަބަދުވެސް އިސްތިޢުމާރާ ދެކޮޅަށް ކުރެވޭ އިންތިފާޟާގެ މައި ހަކަތަ ކަމަށާއި، މި ހަމަލާއަކީ އިސްރާއީލުގެ އަނިޔާވެރިކަމާ ދެކޮޅަށް ދިނީ ޙައްޤު ރައްދެއް ކަމަށެވެ. އަދި ހުޅަނގު އައްސޭރީގެ ރަށްތައް ކުދިކުދި ބައިތަކަކަށް ވަކިކޮށްލަން ޖަހާފައިވާ އަސްކަރީ ޗެކްޕޮއިންޓްތަކަށް ފަލަސްޠީނުގެ ރައްޔިތުން ދުވަހަކުވެސް ބޯނުލަނބާނެ ކަމަށް ބަޔާނުގައިވެއެވެ.

އިސްރާއީލުގެ ރަސްމީ ދިފާޢީ ނިޒާމަށް ބާރުބޮޑުވެ، ނަތަންޔާހޫގެ ސަރުކާރަށް ފާޑުކިޔުންތައް އަމާޒުވަމުންދާއިރު، ފަލަސްޠީނުގެ ޖަމާޢަތްތަކުން ދަނީ ހުޅަނގު އައްސޭރީގެ ހުރިހާ ސިޓީއެއްގައި "އާންމު ރައްކާތެރިކަމުގެ ކޮމިޓީތައް" ހަދައި، ހަރުކަށި ޔަހޫދީ ވަޒަންވެރިންގެ ޖަރީމާތަކަށް ކުރިމަތިލުމަށް ރައްޔިތުންނަށް ގޮވާލަމުންނެވެ.

މި ޙާދިސާއާއެކު، އިސްރާއީލުގެ އެތެރޭގެ ސަލާމަތީ މަސްރަޙު މިހާރު މިއޮތީ ވަރަށް ނާޒުކު ފައްތަރެއްގައެވެ.