އިސްރާއީލުގެ ދެ ސިފައިން މަރުވެ، ހަމަލާދިން ދެމީހުން ޝަހީދުވެއްޖެ

ފަލަސްޠީނުގެ ހުޅަނގު އައްސޭރީގެ ޚަލީލް ސިޓީގެ އުތުރު ބިތުގައި އިސްރާއީލުގެ އިސްތިޢުމާރީ ސިފައިންނާ ދެކޮޅަށް ފަހުގެ ތާރީޚެއްގައި ދެވުނު އެންމެ ވަރުގަދަ ހަމަލާ މިއަދު ދީފިއެވެ.

އިސްރާއީލުގެ އަސްކަރީ މީޑިއާތަކުން ރަސްމީކޮށް ކަށަވަރުކޮށްދީފައިވާ ގޮތުގައި، ޚަލީލްގެ އުތުރުގައިވާ "ފަރްޝް އަލް-ހަވާ" އަސްކަރީ ޗެކްޕޮއިންޓަށް ދިން ކުއްލި ހަމަލާއެއްގައި އިސްރާއީލުގެ ދެ ސިފައިން ވަނީ މަރުވެފައެވެ. އަދި އިތުރު ތިން ސިފައިން ޒަޚަމްވެފައިވާއިރު، އޭގެ ތެރެއިން ދެ މީހެއްގެ ފުރާނައަށް ވަނީ ނުރައްކާވެފައެވެ.

ފަލަސްޠީނުގެ މަޞްދަރުތަކުން ރިޕޯޓުކޮށްފައިވާ ގޮތުގައި، މި ހަމަލާއާ ގުޅިގެން އެ އަސްކަރީ ޗެކްޕޮއިންޓް ސަރަހައްދުގައި ފަލަސްޠީނުގެ މުޖާހިދުންނާއި އިސްރާއީލު ސިފައިންނާ ދެމެދު 20 މިނެޓަށްވުރެ ދިގު މުއްދަތަކަށް ބަޑީގެ ވަރުގަދަ ކުރިމަތިލުންތަކެއް ކުރިއަށްދިޔައެވެ. މި ކުރިމަތިލުންތަކުގައި ހިތްވަރުގަދަކަމާއެކު ހަމަލާ ބަދަލުކުރަމުންދިޔަ ފަލަސްޠީނުގެ ދެ ޒުވާނުން ވަނީ އިސްރާއީލުގެ ބަޑީގެ ހަމަލާތަކުގައި އެ ސަރަހައްދަށް ޝަހީދުވެފައެވެ.

މި ހަމަލާއާ ގުޅިގެން އިސްރާއީލު ސިފައިން ވަނީ ޚަލީލް ސިޓީގެ އުތުރުގެ ހުރިހާ މަގުތަކެއް ބަންދުކޮށް، ކުއްލި ނުރައްކަލުގެ ޙާލަތު އިޢުލާންކޮށްފައެވެ. ހަމައެހެންމެ، މިއަދުގެ ވަގުތެއްގައި ޣައްޒާގެ ދެކުނުގައިވާ ޚާން ޔޫނިސްގެ އަލް-ޤުއްބާ މަގަށް އިސްރާއީލުގެ ޑްރޯނަކުން ދިން ބޮމުގެ ހަމަލާއެއްގައިވެސް ޢާންމު ރައްޔިތަކު ޝަހީދުވެ، ގިނަ ބަޔަކު ޒަޚަމްވެފައިވާތީ، މުޅި ފަލަސްޠީނުގެ މަސްރަޙު މިވަނީ ނުރައްކާތެރި ދަރަޖައަކަށް ހޫނުވެފައެވެ.