ޣައްޒާގެ ސިއްހީ ވުޒާރާއިން މިއަދު ނެރުނު ކަންބޮޑުވާން ޖެހޭ ރަސްމީ ރިޕޯޓެއްގައިވާ ގޮތުން، އިސްރާއީލުން ޣައްޒާގައި ހިންގަމުންދާ ނަސްލު ނައްތާލުމުގެ ހަމަލާތަކުގައި ޝަހީދުވި ފަލަސްޠީނު ރައްޔިތުންގެ ޖުމްލަ ޢަދަދު މިހާރު ވަނީ 75000 އާއި ކައިރި ކޮށްފައެވެ. އޭގައިވާ ސީދާ ޢަދަދަކީ 74,494 އެވެ. މިއީ ސީދާ ހަށިތައް ފެނި އެއީ ކޮން ބައެއްކަން ކަށަވަރު ވެފައިވާ ޝަހީދުންގެ ޢަދަދެވެ. އަދިވެސް އެތައް ބައެއްގެ ހަށިތައް ވީނުވީއެއް ނޭނގިފައި ވެއެވެ.
ޣައްޒާގެ ޖަނާޒާއެއްގެތެރެއިން / ފޮޓޯ: ވަފާ ނިއުސް.
Advertisement
އަދި ހަމަލާތަކުގައި އެކިވަރުގެ ދާއިމީ ނުކުޅެދުންތެރިކަމާއި އަނިޔާތައް ލިބުނު މީހުންގެ ޢަދަދު ވަނީ 175,604 އަށް މަތިވެފައެވެ. ފާއިތުވި 24 ގަޑިއިރު ތެރޭގައިވެސް އިތުރު 7 މީހަކު ޝަހީދުވެފައިވެއެވެ.
މި ރިޕޯޓުގައި އެންމެ ފާހަގަކޮށްލެވޭ ބަޔަކީ، 2025 އޮކްޓޫބަރު 11 ގައި ބައިނަލްއަގުވާމީ މުޖުތަމައުން ޣައްޒާގައި ހަމަލާބަދަލުކުރުން ހުއްޓާލުމުގެ ރަސްމީ އެއްބަސްވުމެއް ގާއިމުކުރި ފަހުން ހިނގާދިޔަ ކަންކަމެވެ. އެ ބަޔާނުގައިވާ ގޮތުން، ސީޒްފަޔާ (ހަނގުރާމަ ހުއްޓާލުމުގެ އެއްބަސްވުން) އިއުލާނުކޮށްފައި އޮތް ނަމަވެސް އިސްރާއީލުގެ ޑްރޯންތަކާއި ވައިގެ ބާރުތަކުން ދިން ސިއްރާއި ފާޅުގައި ދިން ހަމަލާތަކުގައި 1,534 އަށްވުރެ ގިނަ އާންމުން ވަނީ ޝަހީދުކޮށްލާފައެވެ. މިއީ ސީޒްފަޔާގެ ނަމުގައި އިސްރާއީލުން ދުނިޔެއަށް އޮޅުވާލަމުންދާ ކަމުގެ ސާފު ހެއްކެކެވެ.
ޣައްޒާގެ އިންސާނީ ހައްގުތަކާ ބެހޭ ޖަމާއަތްތަކުން ބުނާ ގޮތުގައި، މި ޢަދަދުތަކަކީ ހޮސްޕިޓަލްތަކަށް ގެނެވިފައިވާ މީހުންގެ ޢަދަދެވެ. އިސްރާއީލުގެ ހުރަސްތަކުގެ ސަބަބުން ވޭތުވެދިޔަ ދުވަސްތަކުގައި ސުންނާފަތިވި އިމާރާތްތަކާއި މަގުތަކުގެ ދަށުގައި ތާށިވެ، ނުވަތަ ބަނޑަށް މަރުވެގެން ވަޅުލާފައިވާ އެތައް ހާސް ބައެއްގެ ޢަދަދުތައް މީގެ ތެރެއަކު ނުހިމެނެއެވެ. ޣައްޒާގެ ސިއްހީ ނިޒާމު މުޅިން ބަލިކަށިވެފައިވާއިރު މިފަދަ ލޭއޮހޮރުވުންތައް ހުއްޓުވަން ބައިނަލްއަގުވާމީ ގޮތުން ހަރުކަށި ފިޔަވަޅެއް އަޅާފައެއް ނުވެއެވެ.
