އިސްރާއީލުގެ ސިފައިން ޣައްޒާގެ އުތުރުގައި ބޮމުގެ ހަމަލާތައް ވަރުގަދަކުރާއިރު އިސްރާއިލް 4 ސިފައިން މަރާލައިފި ކަމަށް ޤައްސާމް ބްރިގޭޑްސްއިން ބުނެފިއެވެ.

އިސްރާއީލުގެ 37 ސިފައިން އެއްގަމުމަގު އޮޕަރޭޝަނުގައި މަރުވެފައިވާއިރު އިއްޔެ 2 ސިފައިން މަރުވި ކަމަށް އިސްރާއީލުން ކަށްވަރުކޮށްދެއެވެ.

އިސްރާއީލުގެ ޙަމަލާތައް މިހާރު އިހުނަށްވުރެ ވަރުގަދަ ވެފައިވާއިރު ހުކުރު ދުވަހު ވަނީ 50 ކުޑަކުދިން ޝަހީދުކޮށްލާފައި ކަމަށް މަސްދަރުތައް ބުނެއެވެ. އިއްޔެ އިތުރު ވައިގެ ހަމަލާތަކެއް ޣައްޒާގެ މެދުތެރެއަށް އަމާޒުކޮށްފައިވާއިރު، ބުރޭޖް ކޭމްޕްގައި ފަލަސްތީނުގެ ހަ މީހަކު ވަނީ ޝަހީދު ވެފައެވެ.

ޤަތުލުޢާންމުތައް ހުޅަނގު އައްސޭރިއަށް ވެސް ފޯރާފައިވާއިރު، އިސްރާއީލުގެ ސިފައިން ވަނީ އަލްފައްވާރު ކޭމްޕަށް ވަދެ ފަލަސްތީނުގެ ދިހަ މީހަކު ހައްޔަރުކޮށްފަ އެވެ. މީގެ އިތުރުން ޣައްޒާގައި އުތުރުން ދިން ހަމަލާއެއްގައި އިސްރާއީލުގެ ހަތަރު ސިފައިން މަރާލުމުގެ ޒިންމާ އަލް ގައްސާމް ބްރިގޭޑްސް އިން ވަނީ އުފުލާފައެވެ.

ފަލަސްޠީނުގެ ހެލްތު މިނިސްޓްރީން ބުނާ ގޮތުގައި ޣައްޒާގައި ޝަހީދުވި މީހުންގެ އަދަދު 43،314 އަށް އަރާފައިވާއިރު، އޮކްޓޯބަރު ހަތް ވަނަ ދުވަހުން ފެށިގެން 102،000 އަށް ވުރެ ގިނަ މީހުން ޒަޚަމްވެފައެވެ.