އައްޑޫ ސިޓީގައި ޤާއިމްކުރާ ގާމެންޓް ފެކްޓްރީއަށް އިންވެސްޓްކުރަން ޝައުގުވެރިވާ ފަރާތްތަކަށް އަންނަ ހަފްތާގައި އެ ފުރުޞަތު ހުޅުވާލާނެ ކަމަށް ބިޒްނަސް ސެންޓަރ ކޯޕަރޭޝަން (ބީސީސީ) އިން ބުނެފިއެވެ.
މި މަޝްރޫޢުގެ ފުރަތަމަ ފިޔަވަހީގެ މަސައްކަތްތައް ނިންމައި، ޢަމަލީ މަސައްކަތް ފެށުމަށް ތައްޔާރުވެފައިވާ ކަމަށް ބީސީސީން މަޢުލޫމާތު ދީފައިވެއެވެ.
އިންވެސްޓަރުންނަށް މި މަޝްރޫޢު ހުޅުވާލަން ހަމަޖެހިފައިވަނީ ޖޮއިންޓް ވެންޗަރ، ކޮންޓްރެކްޓަރ ފައިނޭންސް އަދި ޕަބްލިކް ޕްރައިވެޓް ޕަރޓްނަރޝިޕްގެ އުސޫލުންނެވެ.
ބީސީސީގެ މެނޭޖިންގ ޑިރެކްޓަރ އިބްރާހިމް ޒިޔާއު ވިދާޅުވި ގޮތުގައި، މި މަޝްރޫޢަކީ އައްޑޫ ސިޓީގައި ފެހުމުގެ ވިޔަފާރި ކުރާ ފަރާތްތަކަށް ލިބޭނެ ފަހި ފުރުޞަތެކެވެ. އަދި މި ފެކްޓްރީ މެދުވެރިކޮށް އުފައްދާ އުފެއްދުންތައް ފަސޭހައިން މާކެޓްކޮށް، ބާޒާރަށް ނެރުމަށް މަގުފަހިކޮށްދިނުމަކީ ބީސީސީގެ އަމާޒެއް ކަމުގައި އޭނާ ފާހަގަކުރެއްވިއެވެ.
މި މަޝްރޫޢާއެކު ރާއްޖެއަށް އެތެރެކުރާ ފޭރާމުގެ ބާވަތްތައް މަދުކޮށް، ވަޒީފާގެ އިތުރު ފުރުޞަތުތައް އިތުރުކުރުމަކީ ބީސީސީގެ އަމާޒެއް ކަމަށް ވެސް ޒިޔާއު ވިދާޅުވިއެވެ. މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑުގެ އިސްނެގުމާއެކު ތަރައްޤީކުރާ މި ފެކްޓްރީއަކީ ފެހުމުގެ ދާއިރާއިން ކުރިއަށްދާން ބޭނުންވާ ވިޔަފާރިތަކަށް ފުރުޞަތު ފަހިވެ، ސަރުކާރުގެ ސިނާޢީ ތަރައްޤީގެ ހެޔޮ ބަދަލު އައްޑޫ ސިޓީއާއި މުޅި ރާއްޖެއަށް ފެނިގެންދާނެ ކަމެއް ކަމަށް ޒިޔާއު ވަނީ ވިދާޅުވެފައެވެ.
ގާމެންޓް ފެކްޓްރީ ޤާއިމްކުރުމަށް ބޭނުންވާ ބިން ކުއްޔަށް ދޫކުރުމުގެ އެއްބަސްވުމުގައި ބީސީސީއާއި އައްޑޫ ސިޓީ ކައުންސިލުން ސޮއިކުރީ 9 ޖޫން 2024 ގައެވެ. މި މަޝްރޫޢުގެ ދަށުން 30،000 އަކަފޫޓުގެ ބިމެއް ވަނީ ބީސީސީއަށް ކުއްޔަށް ދޫކޮށްފައެވެ.
