މިއަހަރު ބޭއްވުމަށް ހަމަޖެހިފައިވާ ދިވެހިންގެ އުފެއްދުންތެރިކަމުގެ މައުރަޒުގެ ވާދަކުރުމުގެ ބައިގައި ބައިވެރިވުމުގެ މުއްދަތު ހަމަވެފައިވާއިރު، މި މައުރަޒަށް ބޮޑު ތަރުހީބެއް ލިބިފައިވާ ކަމަށް ބިޒްނަސް ސެންޓަރ ކޯޕަރޭޝަން (ބީސީސީ) އިން ހާމަކޮށްފިއެވެ.
ބީސީސީން މައުލޫމާތު ދޭ ގޮތުގައި، ވާދަކުރުމުގެ ބައިގައި ބައިވެރިވުމަށް 700 އަށްވުރެ ގިނަ ފަރާތުން ފޯމު ހުށަހަޅާފައިވާއިރު، މައުރަޒުގައި ބައިވެރިކުރުމަށް 6،000 އަށްވުރެ ގިނަ އުފެއްދުން މިހާތަނަށް ވަނީ ރަޖިސްޓްރީކޮށްފައެވެ. މިއަހަރުގެ މައުރަޒު ކުރިއަށްދާނީ އޮކްޓޯބަރު 25 އިން ނޮވެމްބަރު 2 ގެ ނިޔަލަށެވެ.
މައުރަޒަށް ތަކެތި ބަލައިގަތުމަށް ހަމަޖެހިފައިވަނީ ތިރީގައިވާ ތާވަލާ އެއްގޮތަށެވެ:
Advertisement
- އާންމު އުފެއްދުންތައް: އޮކްޓޯބަރު 7 އިން 13 އަށް
- ކާބޯތަކެތި، ދަނޑުވެރިކަން އަދި މަސްވެރިކަމުގެ އުފެއްދުންތައް: އޮކްޓޯބަރު 15 ގައި
- ކޭކު ޑެކަރޭޝަން: އޮކްޓޯބަރު 17 ގައި
- އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ (އައިސީޓީ): އޮންލައިން ލިންކެއް މެދުވެރިކޮށް
ތަކެތި ބަލައިގަތުމުގެ އިންތިޒާމުތައް ހަމަޖެހިފައިވަނީ، ކަނޑައެޅިފައިވާ މުއްދަތުގައި ކޮންމެ ދުވަހެއްގެ ހެނދުނު 10:00 އިން ރޭގަނޑު 20:00 އަށް ހުޅުމާލެ ސެންޓްރަލް ޕާކުގައެވެ. ބީސީސީން ހާމަކުރި ގޮތުގައި، ތަކެތި ހަވާލުކުރާއިރު ޕޯޓަލް މެދުވެރިކޮށް ފުރިހަމަކުރަންޖެހޭ އެންމެހައި މައުލޫމާތުތައް ފުރިހަމަކޮށް، ބަންދުކުރަންޖެހޭ ތަކެތި ހުންނަންވާނީ ރައްކާތެރިކަމާއެކު ބަންދުކުރެވިފައެވެ.
މިއަހަރުގެ މައުރަޒަށް ލިބުނު ބޮޑު ތަރުހީބާއެކު، ވިޔަފާރިތަކަށް ތަކެތި ވިއްކުމަށް ހާއްސަކޮށްފައިވާ މާކެޓް ޕްލޭސްގެ ހުރިހާ ޖާގައެއް މިހާރު ވަނީ ފުރިފައެވެ. ވޭތުވެދިޔަ އަހަރު 5 ޑިސްޓްރިކްޓެއް ހިމެނުނު ނަމަވެސް، މިއަހަރުގެ މައުރަޒު 7 ޑިސްޓްރިކްޓަކަށް ވަނީ ފުޅާކޮށްފައެވެ. މީގެ ތެރޭގައި ދީނީ ދާއިރާ، ޓެކްނޮލޮޖީ ދާއިރާ އަދި ބައިނަލްއަގުވާމީ (އިންޓަރނޭޝަނަލް) ޑިސްޓްރިކްޓެއް ވެސް ހިމެނެއެވެ.
މި މައުރަޒު ބޭއްވުމުގެ މައިގަނޑު މަގުސަދަކީ ދިވެހިންގެ އުފެއްދުންތެރިކަން ކުރިއަރުވައި، ވިޔަފާރިތަކަށް ފަހި މާކެޓެއް ހޯދައިދިނުމުގެ އިތުރުން، އީޖާދީ އާ ވިސްނުންތަކާއި ހިޔާލުތައް ބަދަލުކުރުމުގެ ފުރުސަތު ފަހިކޮށްދިނުމެވެ.
