ބިޒްނަސް ސެންޓާ ކޯޕަރޭޝަން (ބީސީސީ) އިން މާލޭގައި އިމާރާތް ކުރަމުންދާ 'ކްރިއޭޓާ ހަބް' ގެ މަސައްކަތްތައް ނިންމައި، މިއަހަރުގެ ނޮވެމްބަރު މަހުގެ ތެރޭގައި އެ އިމާރާތް ހުޅުވުމަށް ނިންމައިފި އެވެ.

މިއީ ރާއްޖޭގައި ފަންނުވެރި އިގުތިސާދެއް ނުވަތަ ކްރިއޭޓިވް އިކޮނޮމީއެއް ބިނާކުރުމަށް ސަރުކާރުން ގެންގުޅޭ ސިޔާސަތުގެ ދަށުން ކުރިއަށްގެންދާ މުހިންމު މަޝްރޫއެކެވެ.

މި މަޝްރޫއާ ގުޅޭގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަހަރުގެ ރިޔާސީ ބަޔާނުގައި ވިދާޅުވީ، ކްރިއޭޓާ ހަބަކީ ރާއްޖޭގެ ކުދި އަދި މެދު ފަންތީގެ ވިޔަފާރިތައް ކުރިއެރުވުމަށް އެޅޭ މުހިންމު ފިޔަވަޅެއް ކަމަށެވެ.

"މި އިމާރާތުގެ އަށް ވަނަ ފަންގިފިލާގެ ޝީޓު އެޅުމުގެ މަސައްކަތް މިހާރު ނިމިފައިވާ އިރު، އިރާދަކުރެއްވިއްޔާ އިމާރާތުގެ މަސައްކަތް އެއްކޮށް ނިންމާ މިއަހަރު ނޮވެމްބަރު މަހުގެ 11 ގައި ހުޅުވާނަން،" ރައީސް ވިދާޅުވި އެވެ.

11 ފަންގިފިލާއަށް އިމާރާތްކުރާ މި މަރުކަޒުގައި ދިވެހި ފަންނުވެރިންނާއި އުފެއްދުންތެރިންނަށް ހާއްސަ މަސައްކަތު ޖާގަތަކެއް ގާއިމުކުރެވޭނެ އެވެ. މީގެ އިތުރުން ބީސީސީން ކުދި ވިޔަފާރިތަކަށް ދޭ އެންމެހާ ހިދުމަތްތަކާއި، ކޮންސަލްޓަންސީ އަދި އޮތެންޓިކް މޯލްޑިވްސްގެ މާލޭ ފިހާރަޗވެސް މި އިމާރާތަށް ބަދަލުކުރުމަށް ވަނީ ހަމަޖެހިފަޗއެވެ. މިއާއެކު މި ތަން ވެގެންދާނީ ކުދި ވިޔަފާރިތަކަށް ބޭނުންވާ ހުރިހާ ހިދުމަތެއް އެއް ފުރާޅެއްގެ ދަށުން ލިބޭނެ މަރުކަޒަކަށެވެ.

ބީސީސީން ހާމަކުރި ގޮތުގައި، މި ހަބްގައި ގާއިމުކުރާ ވަސީލަތްތަކަކީ ފަންނުވެރިންނަށް އެންމެ ބޭނުންތެރި ވަސީލަތްތަކެއްކަން ކަށަވަރުކުރުމަށްޓަކައި، އެ ދާއިރާގައި ހަރަކާތްތެރިވާ ފަރާތްތަކުގެ ހިޔާލާއި މަޝްވަރާ ހޯދުމަށް ތަފާތު ފޯރަމްތައް ދަނީ ބާއްވަމުންނެވެ. މިއީ ފަންނުވެރިކަމުގެ ސިނާއަތުގައި މަސައްކަތްކުރާ ފަރާތްތަކަށް ފަސޭހައިން މަސައްކަތް ކުރެވޭނެ މާހައުލެއް ބިނާކުރުމަށް ކުރެވޭ މަސައްކަތެކެވެ.

ޗާންދަނީ މަގުގެ 23 ނަންބަރު ޕްލޮޓުގައި 1،500 އަކަފޫޓުގެ ޖާގައެއްގައި އިމާރާތްކުރާ މި އިމާރާތުގެ މަސައްކަތް ފެޑޯ ޕްރައިވެޓް ލިމިޓެޑާ ހަވާލުކޮށްފައިވަނީ 2024 ވަނަ އަހަރުގެ ފެބްރުއަރީ މަހުގެ ތެރޭގަ އެވެ. މި މަޝްރޫއަކީ ވަޒީރުންގެ މަޖިލީހުގެ ލަފާފުޅާއެކު ރައީސުލްޖުމްހޫރިއްޔާ ނިންމަވާފައިވާ މުހިންމު އިގުތިސާދީ މަސައްކަތެކެވެ.