ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ކުރީގެ ޚާރިޖީ ވަޒީރު ޢަބްދުﷲ ޝާހިދު ހައްޔަރުކުރުމަށް ކޯޓުން ނެރުނު އަމުރު އިސްތިއުނާފު ކުރުމަށް ހުށަހެޅި މައްސަލައިގެ އަޑުއެހުން މިއަދު ކެންސަލްކޮށްފިއެވެ. ހައިކޯޓުގައި މި މައްސަލައިގެ އަޑުއެހުން ކުރިން ތާވަލުކޮށްފައި އޮތީ މިއަދު މެންދުރުފަހު 1:00 އަށެވެ. ނަމަވެސް، އަޑުއެހުން ކެންސަލްކުރި ސަބަބެއް އެ ކޯޓުން ހާމަކޮށްފައެއް ނުވެއެވެ.
ޝާހިދުގެ ފަރާތްޕުޅުން މި ހައްޔަރު އަމުރު ހައިކޯޓުގައި އިސްތިއުނާފު ކުރައްވާފައިވަނީ މި ހިނގާ މަހުގެ ފަސްވަނަ ދުވަހުއެވެ. ކުޑަކުއްޖަކަށް ޖިންސީ ގޯނާކުރި ކަމުގެ ސީރިއަސް ތުހުމަތުގައި ފުލުހުން އޭނާ ހައްޔަރުކޮށްފައިވަނީ މި މަހުގެ ދެވަނަ ދުވަހުއެވެ. މި މައްސަލައިގެ ތަޙުޤީޤަށްޓަކައި، އޭނާ މާލޭގައި ދިރިއުޅުއްވާ ގެ ރޭގެ ވަގުތެއްގައި ފުލުހުން ބަލައިފާސްކޮށް، ތަޙުޤީޤަށް ބޭނުންވާ ބައެއް ހެކިތައް ވަނީ ހޯދާފައެވެ. އަދި އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން ވަނީ 30 ދުވަހުގެ މުއްދަތެއް ދީފައެވެ.
ނިޝާން ޢިއްޒުއްދީނުގެ ޢިއްޒަތުގެ ވެރިޔާގެ ލަޤަބު އަރުވާފައިވާ އަދި އދ. ގެ ޢާންމު މަޖިލީހުގެ ރައީސްކަން ވެސް ކުރައްވާފައިވާ ޝާހިދަކީ، 2028 ވަނަ އަހަރުގެ ރިޔާސީ އިންތިޚާބުގައި އެމްޑީޕީގެ ރިޔާސީ ޓިކެޓް ހޯއްދެވުމަށް ކެމްޕޭން ކުރައްވަމުން ގެންދަވާ ބޭފުޅެކެވެ. އެހެންކަމުން، މި މައްސަލައާ ގުޅިގެން ސިޔާސީ ދާއިރާގައާއި ޢާންމުންގެ މެދުގައި ބޮޑެތި ބަހުސްތަކެއް ވަނީ އުފެދިފައެވެ.
ޝާހިދަކީ ދިވެހިރާއްޖޭގެ ޚާރިޖީ ދާއިރާއާއި، ރައްޔިތުންގެ މަޖިލިސް ހިންގެވުމުގެ އިތުރުން ބައިނަލްއަޤްވާމީ ފެންވަރުގައި 40 އަހަރަށްވުރެ ދިގު މުއްދަތަކަށް ޚިދުމަތް ކުރައްވާފައިވާ ބޭފުޅެކެވެ. އޭނާ ޚާރިޖީ ދާއިރާއާ ގުޅިވަޑައިގަތީ ޖުލައި 1983 ގައި އާދައިގެ ވަޒީފާއަކުންނެވެ. އޭގެފަހުން، ކުރީގެ ރައީސް އަލްއުސްތާޛު މައުމޫން ޢަބްދުލްޤައްޔޫމްގެ ވެރިކަމުގައި ވެސް ސަރުކާރުގެ މުހިންމު އިސް މަޤާމުތަކެއް އޭނާ ވަނީ ފުރުއްވާފައެވެ.
މި މައްސަލައިގެ އިސްތިއުނާފު އަޑުއެހުން ދެން ބާއްވާނެ ތާރީޚެއް ހައިކޯޓުން އަދި އިޢުލާނެއް ނުކުރެއެވެ. އެހެންނަމަވެސް، ތަޙުޤީޤު ކުރިއަށްދާ މިންވަރަކުން މައްސަލައިގެ އިތުރު މަޢުލޫމާތު ހާމަކުރަމުން ގެންދާނެ ކަމަށް ފުލުހުންގެ އިދާރާއިން ވަނީ ބުނެފައެވެ.





