ނިރުބަވެރިކަމުގެ މައްސަލައެއްގައި އިންޓެލިޖެންސް އޮފިސަރުންގެ ހެކިބަސް ސިއްރުކުރުމާމެދު އަލުން ގޮތެއް ނިންމުމަށް ސުޕްރީމް ކޯޓުން އަންގައިފި

ނިރުބަވެރިކަމުގެ ތުހުމަތުކުރެވޭ މައްސަލައެއްގައި ހިމެނޭ ފުލުހުންގެ އިންޓެލިޖެންސް އޮފިސަރުންގެ ހެކިބަހުގެ ސިއްރުކަމާމެދު އަލުން ގޮތެއް ކަނޑައެޅުމަށް ސުޕްރީމް ކޯޓުން ކްރިމިނަލް ކޯޓަށް އަންގައިފިއެވެ.

ސުޕްރީމް ކޯޓުން މިގޮތަށް ނިންމާފައިވަނީ، ނިރުބަވެރިކަން މަނާކުރުމުގެ ގާނޫނުގެ ދަށުން ހަނގުރާމައަށް ދާން އުޅުމާއި، ނިރުބަވެރި ޖަމާއަތްތަކަށް ތާއީދުކުރާ ލިޔުން ގެންގުޅުމުގެ އިތުރުން ނިރުބަވެރިކަމުގެ އަމަލެއް ކުރަން ރޭވުމުގެ ދައުވާ ލިބޭ ސ. މަރަދޫފޭދޫ ފިނިފެންމާގެ އިބްރާހިމް ވިސާމާއި، ގދ. ނަަޑެއްލާ ހިތަށްފިނިވާގެ ސައުސަން ރަޝީދު އަދި މ. އެޗީވް އަބްދުﷲ ހުވައިރިޘް ބިން މުހައްމަދުގެ މައްޗަށް ހިންގާ ޝަރީއަތުގައި ހުށަހެޅި އިންޓެލިޖެންސް އޮފިސަރުގެ ހެކިބަސް ސިއްރުކޮށްދިނުމުގެ އަމުރެއް ނެރެދިނުމަށް ދައުލަތުން އެދުމުންވެސް، އެއީ ކާކުކަން ނޭނގޭ ގޮތަށް ހެކިބަސް ނަގަންޖެހޭ އެކަށީގެންވާ ސަބަބެއް ދެއްކިފައި ނެތް ކަމަށް ބުނެ ކްރިމިނަލް ކޯޓުން އެ އަމުރު ނެރެދީފައި ނުވާތީއެވެ. ކްރިމިނަލް ކޯޓުގެ އެ ނިންމުމަށް ހައިކޯޓުންވެސް ތާއިދުކޮށްފައި ވަނިކޮށް ދައުލަތުން ވަނީ އެ މައްސަލަ ސުޕްރީމް ކޯޓުގައި އިސްތިއުނާފު ކޮށްފައެވެ.

ދައުލަތުން އިސްތިއުނާފުގައި ފާހަގަކޮށްފައިވަނީ، މި މައްސަލައިގައި ހެކިބަސް ދޭން ހުރި އިންޓެލިޖެންސް އޮފިސަރަކީ ކާކުކަން ހާމަވުމުގެ ސަބަބުން އެ އޮފިސަރު އެހެން ޑެސްކް ޖޮބަކަށް ބަދަލުކުރަން ޖެހުނު ކަމަށެވެ. އަދި ރާއްޖޭގެ އިންޓެލިޖެންސްގައި މަސައްކަތް ކުރަނީ ނިސްބަތުން މަދު ބަޔަކަށް ވެފައި، އެމީހުންގެ ވަނަވަރު ހާމަވުމަކީ އިންޓެލިޖެންސް އަދި ތަހުގީގީ އޮޕަރޭޝަންތަކަށް ބޮޑެތި އަސަރުތަކެއް ކުރާނެ ކަމެއް ކަމަށްވެސް ދައުލަތުން ވަނީ ބުނެފައެވެ.

މި މައްސަލައިގައި ސުޕްރީމް ކޯޓުގެ ފަނޑިޔާރު ހުސައިން ޝަހީދު ލިޔުއްވި ހުކުމަށް ފަނޑިޔާރު އަލީ ރަޝީދު ހުސައިން އާއި ފަނޑިޔާރު ޑރ. މުހައްމަދު އިބްރާހީމް ވަނީ ތާއީދުކުރައްވާފައެވެ. އެ ހުކުމުގައި ފާހަގަކުރައްވާފައިވަނީ އިންޓެލިޖެންސް އޮފިސަރުންގެ ވަނަވަރު ހާމަވެއްޖެނަމަ އެކަށީގެންވާ ނުރައްކަލެއް އޮތް ކަމަށް ބެލުމުގެ ފުރުސަތު އެބައޮތް ކަމަށާއި، އޮފިސަރުންގެ މަސައްކަތުގެ ތަބީއަތަށް ބަލައި ޖަމާއީ ގޮތެއްގައި ނުރައްކަލެއް އޮތްކަން ބުނެދެވުމުން ފުދޭނެ ކަމަށެވެ. އަދި ހެކިބަސް ސިއްރުކުރުމާމެދު ގޮތެއް ނިންމާއިރު ވަކި ފަރުދަކަށް އޮތް ނުރައްކަލުގެ އިތުރުން، ދައުލަތުގެ ސެކިއުރިޓީ ނިޒާމާއާއި މައުލޫމާތު ސިއްރުކުރުމުގެ އާންމު މަސްލަހަތަށްވެސް ކޯޓުން ރިއާޔަތްކުރަންޖެހޭނެ ކަމަށް ބަޔާންކޮށް، ސުޕްރީމް ކޯޓުން ވަނީ ހައިކޯޓުގެ ނިންމުން ބާތިލުކޮށް، ހެކި ހިމާޔަތް ކުރުމުގެ އަމުރާމެދު އަލުން ގޮތެއް ކަނޑައެޅުމަށް މައްސަލަ ކްރިމިނަލް ކޯޓަށް ތަހުވީލުކޮށްފައެވެ.