ޖުޑީޝިއަލް ސާވިސް ކޮމިޝަން (ޖޭއެސްސީ) އިން ދިވެހިރާއްޖޭގެ ހައިކޯޓުގެ އިސް ފަނޑިޔާރުގެ މަގާމަށް، އެ ކޯޓުގެ ފަނޑިޔާރު އަލްއުސްތާޛު އަބްދުﷲ ޖަމީލް މޫސާ އައްޔަން ކުރައްވައިފި އެވެ.
ހައިކޯޓުގެ އިސް ފަނޑިޔާރުގެ މަގާމަށް ޖަމީލް އައްޔަން ކުރެއްވިއިރު، އެމަނިކުފާނަކީ މިދިޔަ އަހަރުގެ ނޮވެމްބަރު މަހުގެ 19 ވަނަ ދުވަހުން ފެށިގެން އެ ކޯޓު ވަގުތީ ގޮތުން ހިންގެވުމާ ހަވާލުވެވަޑައިގެން ހުންނެވި ފަނޑިޔާރެވެ. ޖަމީލް ހައިކޯޓުގެ ފަނޑިޔާރުކަމުގެ ހުވާ ކުރެއްވީ 3 އޮގަސްޓް 2023 ގައެވެ.
ތައުލީމީ ދާއިރާއަށް ބަލާއިރު، އަބްދުﷲ ޖަމީލް މޫސާއަކީ ކުއްލިއްޔަތުލް ދިރާސާތުލް އިސްލާމިއްޔާއިން ބެޗްލާސް އޮފް ޝަރީއާ އެންޑް ލޯ (އޮނާސް) ހާސިލް ކުރައްވާފައިވާ ބޭފުޅެކެވެ. މީގެ އިތުރުން، އެމަނިކުފާނަކީ ގާނޫނީ ވަކީލެއްގެ ހައިސިއްޔަތުން ކޯޓުތަކުގައި ވަކާލާތު ކުރައްވާފައިވާ ތަޖުރިބާކާރު ބޭފުޅެއްވެސް މެއެވެ.
Advertisement
ފަނޑިޔާރުކަމުގެ ދާއިރާގައި 15 އަހަރަށްވުރެ ދިގު މުއްދަތަކަށް ހިދުމަތް ކުރައްވާފައިވާ ޖަމީލް ވަނީ މީގެ ކުރިން މުހިންމު މަގާމުތަކެއް ފުރުއްވާފަ އެވެ. އެގޮތުން 23 ސެޕްޓެމްބަރު 2003 އިން 31 ޖަނަވަރީ 2009 އަށް ލ. ދަނބިދޫ މެޖިސްޓްރޭޓް ކޯޓުގެ މެޖިސްޓްރޭޓްކަން ކުރައްވާފައިވެ އެވެ. އަދި 1 ފެބްރުވަރީ 2009 އިން 21 ފެބްރުވަރީ 2019 އާ ހަމައަށް ސިވިލް ކޯޓުގެ ގާޒީގެ މަގާމުވެސް އެމަނިކުފާނު ވަނީ ފުރުއްވާފަ އެވެ.
ހައިކޯޓުގެ އިސް ފަނޑިޔާރުގެ މަގާމު ހުސްވީ އެ މަގާމުގައި ކުރިން ހުންނެވި ހާތިފް ހިލްމީ ފަނޑިޔާރުކަމުން ރިޓަޔާ ކުރެއްވުމާ ގުޅިގެންނެވެ.
ޖަމީލް މި މަގާމަށް އައްޔަން ކުރެއްވީ ޖޭއެސްސީން އެ މަގާމަށް ކުރިމަތިލުމަށް ހުޅުވާލި ފުރުސަތުގައި ކުރިމަތިލެއްވި ބޭފުޅުންނާ އިންޓަވިއު ކުރުމަށްފަހުގަ އެވެ.
