މަކަރާއި ހީލަތް ހެދުމާއި މަނީ ލޯންޑަރިންގެ ގިނަ ދައުވާތަކެއް ސާބިތުވެ 109 އަހަރަށް ޖަލަށްލުމަށް ކްރިމިނަލް ކޯޓުން ހުކުމްކުރި ހުސައިން ޝިފާއު، އެ ހުކުމް ހައިކޯޓުގައި އިސްތިއުނާފުކޮށްފިއެވެ. ސައްހަ ނޫން ޓެލެގްރަފިކް ޓްރާންސްފާ (ޓީޓީ) ފޮނުވައިގެން ބޭރުގެ ކުންފުނިތަކުން މުދާ ހޯދި މައްސަލައިގައި ޝިފާއުގެ މައްޗަށް ޖުމުލަ 23 ދައުވާއެއް އުފުލާފައިވެއެވެ.
ޝިފާއުގެ މައްޗަށް ކްރިމިނަލް ކޯޓުން އިއްވި ހުކުމްގައި ހިމެނެނީ މަނީ ލޯންޑްރިންގެ ހަތް ދައުވާއަކަށް 70 އަހަރުގެ ޖަލު ހުކުމާއި، މަކަރާއި ހީލަތް ހެދުމުގެ ހަތް ދައުވާއަކަށް 30 އަހަރުގެ ޖަލު ހުކުމުގެ އިތުރުން، އެނގިހުރެ ސައްހަނޫން ލިޔުމެއް ދިނުމުގެ ނުވަ ދައުވާއަކަށް އިއްވި ނުވަ އަހަރުގެ ޖަލު ހުކުމެވެ. މީގެ އިތުރުން ހަތް މިލިއަން ރުފިޔާއިން އޭނާ ޖޫރިމަނާކޮށް، އޮޅުވާލައިގެން ހޯދި މުދަލަށްވާ ފައިސާ ހަ މަސް ތެރޭގައި ސިވިލް ކޯޓަށް ދެއްކުމަށްވެސް ވަނީ އަމުރުކޮށްފައެވެ.
ޝިފާއުގެ ފަރާތުން މި މައްސަލަ ހައިކޯޓުގައި އިސްތިއުނާފުކުރި ނަމަވެސް، އެ މައްސަލަ ބަލައިގަތުމާ މެދު ހައިކޯޓުން އަދި ވަކި ގޮތެއް ނިންމާފައެއް ނުވެއެވެ. މި މައްސަލައިގެ ތަހުގީގު މަރުހަލާގައި 2023 ވަނަ އަހަރުގެ އޭޕްރީލް މަހު ޝިފާއު ހައްޔަރުކުރުމަށްފަހު ކޯޓުން ދޫކޮށްލުމުން އޭނާ ވަނީ ރާއްޖެއިން ބޭރަށް ފުރައިގެން ގޮސްފައެވެ.
އޭނާ ހޯދުމަށް އިންޓަޕޯލް ރެޑް ނޯޓިސް ނެރެފައިވަނިކޮށް، ޝިފާއު އެނބުރި ރާއްޖެ އައީ 2023 ސެޕްޓެމްބަރު 28 ގައެވެ. ރާއްޖެ އައުމާއެކު އޭނާގެ ޕާސްޕޯޓު ހިފެހެއްޓި ނަމަވެސް އެ ފަހަރުވެސް އޭނާ ވަނީ ދޫކޮށްލާފައެވެ. ނަމަވެސް މައްސަލައިގެ ޝަރީއަތް ނިމި، އޭނާގެ މައްޗަށް މިހާރު ވަނީ ރާއްޖޭގެ ތާރީޚުގައިވެސް މީހެއްގެ މައްޗަށް އިއްވި އެންމެ ދިގު ޖަލު ހުކުމްތަކުގެ ތެރޭގައި ހިމެނޭ ހުކުމެއް އިއްވާފައެވެ.
