ދެ އިންތިހާބު އެއް ދުވަހެއްގައި ބޭއްވުމާ މެދު ރައްޔިތުންގެ ހިޔާލު ހޯދުމަށް ނަގާ ރައްޔިތުންގެ ފެންނަ ނުފެންނަ ވޯޓު ނެގުން ހުއްޓުވުމަށް، ކުރީގެ ކެންދޫ ދާއިރާގެ މެމްބަރު އަލީ ހުސެއިން ހުށަހެޅުއްވި މައްސަލަ ސުޕްރީމް ކޯޓުން ބޭރުކޮށްފި އެވެ.

މި މައްސަލަ ސުޕްރީމް ކޯޓުގެ ރަޖިސްޓްރާ ބަލައިނުގަތުމަށް ނިންމެވީ، ގާނޫނު އަސާސީގެ 264 ވަނަ މާއްދާގައި ބުނާ އުސޫލަށް އަމަލު ކުރަން ޖެހޭނީ ރައީސުލްޖުމްހޫރިއްޔާ ބިލެއް ތަސްދީގު ނުކުރަން ނިންމަވާ ހާލަތެއްގައި ކަމަށް ބުނެ އެވެ.

އަލީ ހުސެއިން ސުޕްރީމް ކޯޓަށް ހުށަހެޅުއްވި މައްސަލައިގައި ބުނެފައިވަނީ، ދެ އިންތިހާބު އެއްކޮށްލުމާ ގުޅޭގޮތުން މަޖިލީހުން ފާސްކުރި ބިލު ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ފޮނުވި ފަހުން 15 ދުވަސް ވެގެން ދިޔައިރުވެސް އެ ބިލު ތަސްދީގު ކުރުމާ މެދު ގޮތެއް ނިންމާފައި ނުވާ ކަމަށެވެ. އަދި ގާނޫނުއަސާސީގެ 264 ވަނަ މާއްދާގައި ބުނާ އުސޫލަށް އަމަލުކޮށްފައި ނުވުމާއެކު، ބިލު ތަސްދީގު ކުރަން ކަނޑައަޅާފައިވާ މުއްދަތު ފަހަނައަޅާ ގޮސްފައިވާތީ، އެ ބިލަކީ މިހާރު ބާތިލްވެފައިވާ ބިލެއް ކަމަށް ކަނޑައަޅައިދިނުމަށް އޭނާ އެދިވަޑައިގެންފައިވެ އެވެ. މީގެ އިތުރުން އެ ބިލާ މެދު ރައްޔިތުންގެ ފެންނަ ނުފެންނަ ވޯޓެއް ނެގުމަކީ ގާނޫނާ ހިލާފަށް ކުރާ ކަމެއް ކަމަށްވެސް އެ މައްސަލައިގައި ފާހަގަކޮށްފައިވެ އެވެ.

ނަމަވެސް ސުޕްރީމް ކޯޓުގެ ރަޖިސްޓްރާގެ ނިންމެވުމުގައި ބަޔާންކޮށްފައިވަނީ، ގާނޫނު އަސާސީގެ 264 ވަނަ މާއްދާގައި ބުނާ އިޖުރާއަތަށް އަމަލުކުރަން ޖެހޭނީ ރައީސް ބިލެއް ތަސްދީގު ނުކުރަން ނިންމަވާ ހާލަތުގައި ކަމަށާއި، މިހާތަނަށް ބިލު ތަސްދީގު ނުކުރަން ރައީސް ނިންމެވި ކަމެއް އެނގެން ނެތް ކަމަށެވެ. އެހެންކަމުން އެ މައްސަލަ ކޯޓުގައި ކުރިއަށްގެންދިއުމުގެ ހުއްދަ ނުދިނުމަށް ވަނީ ނިންމާފަ އެވެ.

އަލީ ހުސެއިންގެ މައްސަލަ ބަލައިނުގަތް ނަމަވެސް، މި މައްސަލައާ ގުޅިގެން ދެން ހުށަހެޅި މައްސަލަ ސުޕްރީމް ކޯޓުން ވަނީ ބަލައިގަނެފަ އެވެ. އެއީ އެމްޑީޕީގެ ގާނޫނީ ވަކީލުންގެ ޓީމުން ދެ އިންތިހާބުގެ ވޯޓު އެއް ދުވަހެއްގައި ނެގުމަށް ދެކޮޅު ހަދަމުން ހުށަހެޅި ދުސްތޫރީ މައްސަލައެވެ. މި މައްސަލައިގެ ޝަރީއަތް މާދަމާ ފެށުމަށް މިހާރު ވަނީ ތާވަލުކޮށްފައެވެ.

އެމްޑީޕީގެ ފަރާތުން ހުށަހެޅި މައްސަލައިގައި ބުނެފައިވަނީ، ރައްޔިތުންގެ ހިޔާލު ހޯދުމަށް ނަގާ ވޯޓުގައި ރައްޔިތުންގެ ކިބައިން ކުރާ ސުވާލަކީ ގާނޫނު އަސާސީއާ ހިލާފު ސުވާލެއް ކަމަށާއި، އެ ސުވާލު ހިމެނޭ ގޮތަށް ފެންނަ ނުފެންނަ ވޯޓު ކުރިއަށް ނުގެންދެވޭނެ ކަމަށެވެ. މީގެ ކުރިން އެމްޑީޕީން ވަނީ މި މައްސަލަ ހައި ކޯޓަށްވެސް ހުށަހަޅާ، ވޯޓު ހުއްޓުވުމުގެ ވަގުތީ އަމުރަކަށް އެދިފައެވެ. ނަމަވެސް އެ މައްސަލަ ބަލައިގަތުމާ މެދު ހައި ކޯޓުން އަދި ވަކި ގޮތެއް ނިންމާފައެއް ނުވެ އެވެ