އިދިކޮޅު އެމްޑީޕީގެ އެތެރޭގެ މަސްރަހު އަނެއްކާވެސް ހޫނުވެ، އެ ޕާޓީގެ އިސް ލީޑަރުންގެ މެދުގައި ބޮޑެތި ޚިޔާލުތަފާތުވުންތަކެއް އުފެދި، ރެނދުތައް ލައިފިއެވެ. ޚާއްޞަކޮށް، ރާއްޖޭގެ ވެރިކަމުގެ ނިޒާމު ބަދަލުކުރުމަށް ކުރީގެ ރައީސް މުހައްމަދު ނަޝީދާއި ފައްޔާޒު އިސްމާއިލް އިސްވެ މިއަހަރުގެ އެޕްރީލް 19 ވަނަ ދުވަހު އިޢުލާންކުރެއްވި "ބޮޑުބަދަލު" ހަރަކާތުގެ މެދުގައި ކޯޅުން ބޮޑުވެ، ފައްޔާޒު އެ ހަރަކާތުގެ ގްރޫޕްތަކުން ވެސް ވަކިވީއެވެ.
މި ހޫނުގަނޑު ބޮޑުވެގެން އުޅެނީ 2028 ގެ އިންތިހާބަށް އަމާޒުކޮށް، ދައުލަތުގެ އެންމެ މަތީ ވެރިޔާއާއި ސަރުކާރުގެ ވެރިޔާގެ މަގާމު ވަކިކުރުމަށް ހުށަހަޅާފައިވާ އިސްލާހީ ޕެކޭޖުގެ ބައެއް މާއްދާތަކަށް ބާރުވެރިކަން ބެހިގެންދާނެ ގޮތަކާއި މެދު ރައީސް ނަޝީދާއި ފައްޔާޒާއި ދެމެދު އެއްގަލަކަށް ނޭރުމުން، ސީދާ ނަޝީދު ވެރިކަމަށް އައުމަށް ކެމްޕޭނު ކުރަން ފެށި ހިސާބުންނެވެ.
ބޮޑުބަދަލުގެ ވަޓްސްއެޕް ގުރޫޕްގައި، ވެރިކަމަށް ދެން ގެންނަންވީ ނަޝީދު ކަމަށް ބުނެ ވާހަކަތައް ދައްކާތީވެ ފައްޔާޒު ވަނީ ވަރަށް ބޮޑަށް ހިތްހަމަނުޖެހިފައެވެ.
Advertisement
އެމްޑީޕީގެ އެތެރޭގެ ބައެއް ބޭފުޅުން ތުހުމަތުކުރާ ގޮތުގައި، ހަރަކާތުގެ މިސްރާބު ހުރި ގޮތުންނާއި ނިންމުންތައް ނިންމުމުގައި ނަޝީދުގެ ނުފޫޒު ގަދަވުމަކީ ފައްޔާޒު މި ހަރަކާތާއި ދުރަށް ޖެހިވަޑައިގަތުމަށް މަގުފަހިވި ސަބަބެކެވެ.
ގުރޫޕުން ނިކުންނަމުން ފައްޔާޒް ވަނީ އެ ގުރޫޕް އުފެއްދި ބޭނުން މިހާރު ކެނޑި ބޭކާރު މައްސަލަތައް އުފެދުމަށް ފުރުސަތު ފަހިވަމުންދާ ކަމަށް ވިދާޅުވެފައެވެ. އަދި ވިދާޅުވީ އެމްޑީޕީގެ ރިޔާސީ ޕްރައިމަރީގައި ވާދަކުރަން ބޭނުންވާ ކޮންމެ ބޭފުޅަކަށް އެ ފުރުސަތު އޮންނާނެ ކަމަށާ ރިޔާސީ ރޭހަށް ނިކުންނަން ބޭނުންވާ ބޭފުޅުން އެކަން ކުރަންވާނެ ކަމަށެވެ.
