ހެކި ރައްކާތެރިކުރުމުގެ އަމުރުގެ ދަށުން ރައްކާތެރިކުރެވޭ ލިޔުންތައް، ޕްރޮސިކިއުޓާ ޖެނެރަލްގެ އޮފީހުގައި ބަލައި ދިރާސާކުރެވޭނެ ފަސޭހަ އިންތިޒާމުތަކެއް އެ އޮފީހުން ހަމަޖައްސައިފިއެވެ.

މި އިންތިޒާމު ހަމަޖައްސާފައިވަނީ ދިވެހިރާއްޖޭގެ ސުޕްރީމް ކޯޓުން ނިންމާފައިވާ ނަންބަރު: 2026/SC-A/09 (ޕްރޮސިކިއުޓާ ޖެނެރަލް ވ. މުހައްމަދު) ގަޟިއްޔާގެ ނިންމުމާ އެއްގޮތްވާ ގޮތުގެ މަތިންނެވެ. އެ ގަޟިއްޔާގައި ބަޔާންކޮށްފައިވަނީ، ހެކި ރައްކާތެރިކުރުމުގެ އަމުރެއްގެ ދަށުން ހިމެނޭ ލިޔުންތައް ކޯޓުގައި ބަލައި ދިރާސާކުރުމުގެ އިންތިޒާމު ހަމަޖެއްސުމަށް ކޯޓުތަކަށް ދަތިވާނަމަ، ކަނޑައެޅޭ ހަރުދަނާ އުސޫލުތަކަކާއި ޝަރުތުތަކާއެކު ޕީޖީ އޮފީހުގައި ނުވަތަ ދައުލަތުގެ އެހެން އިދާރާއެއްގައި އެ ފުރުސަތު ދިނުމަށް އެންގުމުގެ އިހުތިޔާރު މައްސަލަ ބައްލަވާ ފަނޑިޔާރަށް ލިބިގެންވާ ކަމަށެވެ.

ސުޕްރީމް ކޯޓުގެ މި ނިންމުމުގެ މަގްސަދު ހާސިލުކުރުމަށްޓަކައި، 26 އެޕްރީލް އިން ފެށިގެން ޕީޖީ އޮފީހުން ވަނީ ދިފާއަށް މިފަދަ ލިޔުންތައް ބަލައި ދިރާސާކުރެވޭނެ ލުއި އިންތިޒާމެއް ގާއިމުކޮށްފައެވެ. މި މަސައްކަތް ކުރިއަށްގެންދާނީ "ހެކި ރައްކާތެރިކުރުމުގެ އަމުރުގެ ދަށުން ޝަރުތުތަކާއެކު ޕްރޮސިކިއުޓާ ޖެނެރަލްގެ އޮފީހުގައި ހެކިތައް ބަލައި ދިރާސާކުރުމުގެ ފުރުސަތު ދިނުމުގައި އަމަލުކުރާނެ ގޮތުގެ އުސޫލު" ގެ ދަށުންނެވެ.

މި އުސޫލުގައިވާ ގޮތުން، ދަޢުވާލިބޭ ފަރާތަށް ލިޔުންތައް ދެއްކުމަށް ކޯޓަކުން އަމުރުކޮށްފިނަމަ، އެ އިންތިޒާމު ހަމަޖެއްސުމަށް އެދި ހުށަހަޅަންޖެހޭނީ އެކަމަށް ހާއްސަކޮށްފައިވާ "ހެކި ރައްކާތެރިކުރުމުގެ އަމުރުގެ ދަށުން ޕްރޮސިކިއުޓާ ޖެނެރަލްގެ އޮފީހުގައި ހެކި ބަލައި ދިރާސާކުރުމަށް އެދި ހުށަހަޅާ ފޯމު" މެދުވެރިކޮށެވެ. މި ފޯމާއި އުސޫލު ޕީޖީ އޮފީހުގެ ވެބްސައިޓް (www.pgoffice.gov.mv) އިން މިހާރު ލިބެން ހުންނާނެއެވެ.

ޕީޖީ އޮފީހުން މަޢުލޫމާތު ދޭ ގޮތުގައި، މި އުސޫލުގެ ދަށުން ހެކިތައް ދިރާސާކުރުމުގެ ފުރުސަތު ދެވޭނީ ކޯޓު އަމުރުގައި ބަޔާންކޮށްފައިވާ މިންވަރަށް، އެކަމަށްޓަކައި ހާއްސަކުރެވިފައިވާ ތަނެއްގައެވެ. މިއީ ޝަރީއަތްތަކުގެ މަސައްކަތް ހަރުދަނާކޮށް، އަދުލުވެރި ދައުވާއެއް ކުރުމުގެ ހައްގު ކަށަވަރުކުރުމަށް އެޅުނު މުހިންމު ފިޔަވަޅެކެވެ.