ކުޑަކުއްޖަކަށް ޖިންސީ ގޯނާކުރި ކަމުގެ ސީރިއަސް ތުހުމަތުތަކެއްގައި ހައްޔަރުކޮށްފައިވާ، ޓިއުޝަންގެ ހިދުމަތް ދޭ "ބްރައިޓް މައިންޑްސް"ގެ ވެރިޔާ އަލީ އަފްލާހުގެ މައްޗަށް ދައުލަތުން ދައުވާ އުފުލައިފި އެވެ.

އިންޑިއާގައި އުޅުމަށްފަހު ރާއްޖެ އައިތަނުން، ވެލާނާ އިންޓަނޭޝަނަލް އެއާޕޯޓުން މި އަހަރުގެ ފެބްރުއަރީ މަހުގެ 11 ވަނަ ދުވަހު ހައްޔަރުކުރި އަފްލާހުގެ މައްޗަށް، ޕްރޮސެކިއުޓަރު ޖެނެރަލްގެ އޮފީހުން ވަނީ ޖުމްލަ 6 ދައުވާއެއް އުފުލާފަ އެވެ.

އަފްލާހުގެ މައްޗަށް އުފުލާފައިވާ ދައުވާތަކުގެ ތެރޭގައި ހިމެނެނީ:

1. މަހްރަމަކާއެކު ޖިންސީ އަމަލެއް ހިންގުމުގެ ކުށުގެ 3 ދައުވާ.
2. ކުޑަކުއްޖަކަށް ޖިންސީ ގޯނާ ކުރުމަށްޓަކައި އެ ކުއްޖާ ގްރޫމްކުރުމުގެ ކުށުގެ ދައުވާ.
3. އިތުބާރުކުރެވޭ މަޤާމެއްގައި ހުރެ ކުޑަކުއްޖަކާއެކު ޖިންސީ އަމަލެއް ހިންގުމުގެ ކުށުގެ ދައުވާ.
4. އަދުލު އިންސާފު ގާއިމުކުރުމަށް ހުރަސްއެޅުމުގެ ކުށުގެ ދައުވާ.

މި މައްސަލައާ ގުޅޭގޮތުން ޕީޖީ އޮފީހުން ބުނެފައިވަނީ، އަފްލާހުގެ މައްޗަށް ތުހުމަތު ކުރެވެނީ އިތުބާރުކުރެވޭ މަގާމެއްގައި ހުރެ، ކުޑަކުއްޖެއްގެ އުމުރުން 14 އަހަރުން ފެށިގެން 16 އަހަރާ ދެމެދު ތަކުރާރުކޮށް އެކުއްޖާއަށް ޖިންސީ ގޯނާކޮށްފައިވާ ކަމަށެވެ.

މި މައްސަލައަކީ ގިނަ ބައެއްގެ ސަމާލުކަން ހުއްޓިފައިވާ މައްސަލައަކަށްވާއިރު، އޭނާ ހައްޔަރުކޮށްފައިވަނީ ރާއްޖެއިން ބޭރުގައި އުޅުމަށްފަހު އެނބުރި އައި ވަގުތުގަ އެވެ. އަފްލާހަކީ ފުޅާ ދާއިރާއެއްގައި ޓިއުޝަންގެ ހިދުމަތްދޭ މަރުކަޒެއް ހިންގަމުން އައި ފަރާތެކެވެ.