ތ. ގާދިއްފުށީ ކައުންސިލްގެ ރައީސްގެ ފިރިހެން ދަރިފުޅު، ކުޑަ އަންހެން ކުއްޖަކާ ބެހުނު ކަމަށް ތުހުމަތުކުރެވޭ މައްސަލައެއް ކަމާބެހޭ އިދާރާތަކުން ބަލަން ފަށައިފިއެވެ.
މައުލޫމާތު ލިބިފައިވާ ގޮތުގައި އެމްޑީޕީއަށް ނިސްބަތްވެވަޑައިގަންނަވާ އެ ރަށު ކައުންސިލްގެ ރައީސްގެ ފިރިހެން ދަރިފުޅު ޖިންސީ ގޯނާކޮށްފައިވަނީ އުމުރުން އެންމެ 8 އަހަރުގެ އަންހެން ކުއްޖަކަށެވެ. މި މައްސަލަ ފެންމަތިވުމާ ގުޅިގެން ކަމާގުޅުންހުރި އިދާރާތަކުން މިހާރު ވަނީ އެ ރަށުގައި ހަރަކާތްތެރިވާން ފަށާފައެވެ.
މި ހާދިސާއާ ގުޅިގެން ޖެންޑާ މިނިސްޓްރީގެ ޓީމަކާއި މޯލްޑިވްސް ޕޮލިސް ސާވިސްގެ އޮފިސަރުން މިހާރު ދަނީ ގާދިއްފުށީގައި ހަރަކާތްތެރިވަމުންނެވެ. އަދި އަނިޔާ ލިބުނު ކުއްޖާގެ ރައްކާތެރިކަން ކަށަވަރުކުރުމަށާއި، މި މައްސަލައިގެ ތަހުގީގަށް ބޭނުންވާ މައުލޫމާތު އެއްކުރުމުގެ މަސައްކަތް ދަނީ ކުރަމުންނެވެ.
Advertisement
ކުޑަކުދިންނަށް ކުރާ މިފަދަ އަނިޔާތަކާއި ޖިންސީ ގޯނާގެ މައްސަލަތަކަކީ ސަރުކާރުންނާއި ކަމާބެހޭ މުއައްސަސާތަކުން ވަރަށް ސީރިއަސްކޮށް ބަލަމުން އަންނަ މައްސަލަތަކެކެވެ.
މި މައްސަލައާ ގުޅޭ އިތުރު ތަފުސީލު އަދި ފުލުހުންނާއި ޖެންޑާ މިނިސްޓްރީން ރަސްމީކޮށް ހާމަކޮށްފައެއް ނުވެއެވެ. މި މައްސަލައިގެ އިތުރު ތަފުސީލު ލިބެމުންދާ ވަރަކަށް ގެނެސްދެވޭނެއެވެ.
