ފުވައްމުލައް ސިޓީގައި ފުލުހުން ހިންގި ހާއްސަ އޮޕަރޭޝަނެއްގައި މަސްތުވާތަކެއްޗާއެކު ދެ މީހަކު ހައްޔަރުކޮށް، މަސްތުވާތަކެތި ކެފޭ އުސޫލުން ބޭނުންކުރުމުގެ ހިދުމަތް ދެމުންދިޔަ ތަނެއް ކޯޓު އަމުރެއްގެ ދަށުން 90 ދުވަހުގެ މުއްދަތަށް ބަންދުކޮށްފި އެވެ.
ފުވައްމުލައް ޕޮލިހާއި ކައުންޓާ ނާކޮޓިކްސް އިންޓެލިޖެންސް ގުޅިގެން މި ހިނގާ މަހުގެ 19 ވީ ބުރާސްފަތި ދުވަހު ހިންގި މި އޮޕަރޭޝަނުގައި ހައްޔަރުކޮށްފައިވަނީ އެ ރަށު ދޫޑިގަމު މާދޫގޭ، އަޙްމަދު ރަޝީދު (32އ) އަދި އެ އަވަށު ރޫބީ، މުޙައްމަދު ޝާޛް (36އ) އެވެ. މި ދެ މީހުން ހައްޔަރުކޮށް ބަލައިފާސްކުރިއިރު، މަސްތުވާތަކެތިކަމަށް ޝައްކުކުރެވޭ 17 ގްރާމުގެ ތަކެތި ފެނިފައިވާ ކަމަށް ފުލުހުން ހާމަކުރި އެވެ.
މި މައްސަލައާ ގުޅިގެން އެ ދެ މީހުންގެ ބަންދާމެދު ގޮތެއް ނިންމުމަށް ފުވައްމުލައް މެޖިސްޓްރޭޓް ކޯޓަށް ހާޒިރުކުރުމުން، މުޙައްމަދު ޝާޛް 15 ދުވަހަށް އަދި އަހްމަދު ރަޝީދު 12 ދުވަހަށް ބަންދުގައި ބަހައްޓައިގެން ތަހުގީގު ކުރިއަށް ގެންދިއުމަށް ކޯޓުން ވަނީ އަމުރުކޮށްފަ އެވެ.
ފުލުހުން ބުނިގޮތުގައި، ހައްޔަރުކުރި އަހްމަދު ރަޝީދު ދިރިއުޅޭ މާދޫގޭގެ ބައިގައި މަސްތުވާތަކެތި ކެފޭ އުސޫލުން ފޯރުކޮށްދީ، އެ ތަނުގައި މަސްތުވާތަކެތި ބޭނުންކުރުމުގެ ފުރުސަތު ފަހިކޮށްދެމުންދާކަން ވަނީ ފާހަގަކުރެވިފަ އެވެ. އެހެންކަމުން މުޖުތަމައުގެ ސަލާމަތާއި ރައްކާތެރިކަމަށްޓަކައި، ކޯޓު އަމުރެއްގެ ދަށުން އޭނާ ދިރިއުޅޭ އެ ބައި ވަނީ ތިން މަސްދުވަހަށް ބަންދުކޮށްފަ އެވެ.
މި މައްސަލަ ފުލުހުން ދަނީ އިތުރަށް ސީރިއަސް މައްސަލައެއްގެ ގޮތުގައި ތަހުގީގު ކުރަމުންނެވެ.





