ލ. އަތޮޅުގައި ފުލުހުން ހިންގި މަސްތުވާތަކެތީގެ އޮޕަރޭޝަނެއްގައި ހައްޔަރުކުރި އައިޝަތު ފަހުދާގެ މައްޗަށް ދައުލަތުން އުފުލި ޑައިމޯފިން ޓްރެފިކްކުރުމުގެ ދައުވާ، ޕްރޮސެކިއުޓާ ޖެނަރަލް (ޕީޖީ) އޮފީހުން ގާނޫނީ އިޖުރާއާތްތަކުގެ މަތިން އަނބުރާ ގެންގޮސްފިއެވެ. ލ. ފޮނަދޫ މެޖިސްޓްރޭޓް ކޯޓުގައި މި މައްސަލައިގެ ޝަރީއަތް ކުރިއަށްދަނިކޮށް، ދައުލަތުން ދައުވާ އަނބުރާ ގެންދިޔައީ މައްސަލައިގެ ގާނޫނީ ހެކިތަކަށް ރިއާޔަތްކުރުމަށްފަހުއެވެ.

މި މައްސަލައިގައި ފަހުދާގެ ލައިގެން ހުރި ޖަންގިޔާ ތެރެއިން ފެނުނު 9.2 ގްރާމްގެ ހެރޮއިން އަކީ އޭނާގެ ތަކެތި ނޫން ކަމަށާއި، އެއީ އަމިއްލަ އެއްޗެހި ކަމަށް ބުނެ އޭނާގެ ފިރިމީހާ އިބްރާހިމް އިމާދު ވަނީ ކޯޓުގައި ކުށަށް އިއުތިރާފްވެފައެވެ. ފުލުހުން ފެނުމުން ހާސްވެގެން އަނބިމީހާގެ ހަށިގަނޑުގައި އެތަކެތި ފޮރުވީ އަމިއްލައަށް ކަމަށާއި، އޭގައި ހުރީ މަސްތުވާތަކެތިކަން އަނބިމީހާއަށް ނޭނގޭނެ ކަމަށް އިމާދު ބުނުމާއި ގުޅިގެން، ފަހުދާގެ ކިބައިގައި ކުށް ކުރުމުގެ "ޖިނާއީ ނިޔަތް" އޮތްކަން ގާނޫނީ ގޮތުން ސާބިތުކޮށްދެވެން ނެތް ކަމަށް ޕީޖީ އޮފީހުން ވިދާޅުވިއެވެ.

މި މައްސަލައިގައި މުޅި ކުށުގެ ޒިންމާ އަމިއްލައަށް އުފުލައި، ދައުލަތާއި އެކު އިމާދު އެކުލަވައިލި އިއުތިރާފް އެއްބަސްވުމުގެ ދަށުން ކޯޓުން ވަނީ އޭނާގެ މައްޗަށް 13 އަހަރު ދުވަހުގެ ޖަލު ހުކުމަކާއި 50،000 ރުފިޔާގެ ޖޫރިމަނާއެއް އިއްވާފައެވެ. ގާނޫނީ މާހިރުން ފާހަގަކުރާ ގޮތުގައި މި ނިންމުމަކީ ޖިނާއީ ކުށްތައް ސާބިތުކުރުމުގައި "އަމަލާއި ނިޔަތް" ގުޅިފައި އޮންނަންޖެހޭނެ ކަމަށް ކަނޑައަޅާފައިވާ ގާނޫނީ އަސާސްތަކުގެ މަތިން ނިންމާފައިވާ ނިންމުމެކެވެ.