ނަސްރުގެ ދުވަހުގެ މުނާސަބަތުގައި، އެމްއެންޑީއެފުން އަހަރަކު ދެ ފަހަރު ލިޔެ ޝާއިއުކުރަމުން އަންނަ ދިވެހި ސިފައިންގެ މަޖައްލާ "އައްޑަނަ" ގެ 40 ވަނަ އަދަދު ނެރެފިއެވެ.
މި މަޖައްލާ ނެރެދެއްވީ ނޮވެންބަރު 13 ވަނަ ދުވަހު ހއ. ދިއްދޫގައި ބޭއްވި ނަސްރުގެ ދުވަހުގެ ސިފައިންގެ މައުރަޒު ހުޅުވުމުގެ ރަސްމިއްޔާތުގެ ހަވާސާގެ ތެރެއިން، ރަސްމިއްޔާތުގެ ޝަރަފުވެރި މެހުމާން، ނޮދަން އޭރިއާ ކޮމާންޑުގެ ކޮމާންޑަރ، ބްރިގޭޑިއަރ ޖެނެރަލް އިސްމާއީލް ޝަރީފެވެ. 2007 ވަނަ އަހަރުން ފެށިގެން ސިފައިންގެ ދުވަހާއި ނަސްރުގެ ދުވަހުގެ މުނާސަބަތުގައި ނެރެމުން އަންނަ މި މަޖައްލާގެ މިއަހަރުގެ ތީމަކީ "ސިފައިންގެ ގައުމީ ހިތްވަރު" އެވެ.
މި އަދަދުގައި ރާއްޖޭގެ ފުންނާބުއުސް އިލްމީ ލިޔުންތެރިންނާއި ސިފައިންގެ ލިޔުންތެރިން ލިޔުއްވާފައިވާ އިލްމީ ލިޔުންތަކާއި ދިރާސާތައް ތަފްސީލުކޮށް ހިމަނާފަވެއެވެ. އެގޮތުން ގައުމިއްޔަތު، އިޖުތިމާއީ، ދީނާއި ދުނިޔެ، ތާރީހު، އަދި ބަހާއި އަދަބިއްޔާތުގެ ދާއިރާއިން ތަފާތު ރަހަތަކުގެ މުހިންމު ލިޔުންތައް ހިމަނައިގެން މަޖައްލާ ވަނީ މުއްސަނދިކޮށްފައެވެ. މިއީ ސިފައިންނާއި އާންމުންގެ މެދުގައި އިލްމީ އަދި ތާރީހީ މައުލޫމާތު ފެތުރުމަށްޓަކައި ކަމާބެހޭ ފަރާތްތަކުން ތައްޔާރުކޮށްފައިވާ ހާއްސަ އަދަދެކެވެ.
Advertisement
ގިނަ ބަޔަކަށް މި މަޖައްލާ ފަސޭހަކަމާއެކު ކިޔާލުމުގެ ފުރުސަތު މަގުފަހިކޮށްދިނުމުގެ ގޮތުން، އެމްއެންޑީއެފުން އައްޑަނަ މަޖައްލާ އޮންލައިންކޮށް ކިޔާލެވޭ ގޮތަށް އެމްއެންޑީއެފްގެ ރަސްމީ ވެބްސައިޓާއި އައްޑަނަ ވެބްސައިޓުގައި ޝާއިއުކޮށްފިއެވެ. މީގެއިތުރުން، ކިޔުންތެރިންނަށް އޮންލައިންކޮށް މަޖައްލާ ކިޔާލުމުގެ އިތުރުން ސީދާ ޑައުންލޯޑު ކުރެވޭނެ އިންތިޒާމު ވެސް ހަމަޖައްސައިދީފަވެއެވެ.
