ރ. މާކުރަތުގައި މަސައްކަތްކުރާ ބިދޭސީންނާ ގުޅިގެން ހުރި ކަންބޮޑުވުންތައް ހިއްސާކުރުމަށް، އެ ރަށު ކައުންސިލްގެ ވަފުދަކުން ކޮންޓްރޯލަރ ޖެނެރަލް އޮފް އިމިގްރޭޝަން، ސީޕީ (ރިޓަޔަރޑް) އަޙްމަދު ފަސީޙާ ބައްދަލުކުރައްވައިފިއެވެ.
މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ އެ ރަށުގައި ދިރިއުޅޭ ބިދޭސީންނަކީ ސައްހަ ލިޔެކިޔުމާއި ހުއްދައާއެކު ގަވާއިދުން މަސައްކަތްކުރާ ފަރާތްތަކެއްކަން ކަށަވަރުކުރުމާ ގުޅޭގޮތުންނެވެ. އަދި މި މައްސަލަތަކަށް ދާއިމީ ހައްލެއް ހޯދުމަށްޓަކައި، ކަމާގުޅުންހުރި އިދާރާތަކާ ގުޅިގެން މަސައްކަތްކުރުމުގެ މުހިންމުކަން ދެ ފަރާތުން ވެސް ފާހަގަކުރެއްވިއެވެ.
ކައުންސިލުން ފާހަގަކުރެއްވި ކަންކަމަށް އިޖާބަދެއްވަމުން، އިމިގްރޭޝަންގެ ކޮންޓްރޯލަރ ޖެނެރަލް ވަނީ އެ ރަށުގެ ކަންބޮޑުވުންތައް ހައްލުކުރުމުގައި ކައުންސިލާއެކު އޮންނަ ގުޅުން އިތުރަށް ބަދަހިކޮށް، ފުރިހަމަ އެއްބާރުލުން ދެއްވާނެކަމުގެ ޔަގީންކަން އަރުވާފައެވެ. އަދި ރައްޔިތުންގެ މަސްލަހަތު ހިމެނޭ މިފަދަ ކަންކަމުގައި ގުޅިގެން ފިޔަވަޅުތައް އެޅުމުގެ މުހިންމުކަމަށް ވެސް އެމަނިކުފާނު އަލިއަޅުއްވައިލެއްވިއެވެ.
Advertisement
މިފަދަ ބައްދަލުވުންތަކުގެ ސަބަބުން، ލޯކަލް ކައުންސިލްތަކާއި ދައުލަތުގެ މުއައްސަސާތަކުގެ މެދުގައި އޮންނަ ގުޅުން ހަރުދަނާވެގެންދެއެވެ. އަދި މިއީ ރަށްރަށުގައި ގަވާއިދާ ހިލާފަށް އުޅޭ ބިދޭސީންގެ މައްސަލަތައް ހައްލުކޮށް، ރަށްރަށުގެ އަމަންއަމާންކަމާއި ރައްކާތެރިކަން ދެމެހެއްޓުމަށް އެޅިގެންދިޔަ މުހިންމު ފިޔަވަޅެކެވެ.
