ރާއްޖޭގެ ވަޒީފާގެ މާހައުލާއި އިގްތިސާދީ ސެކްޓަރު ސާފުކޮށް، ގަވާއިދާ ހިލާފަށް އުޅޭ ބިދޭސީންގެ ސަބަބުން އިގްތިސާދަށް ލިބޭ ގެއްލުންތައް ކުޑަކުރުމަށްޓަކައި ކުރެވޭ މަސައްކަތުން ބޮޑެތި ކާމިޔާބީތަކެއް ހޯދެމުންދާކަން ހާމަވެއްޖެއެވެ. ޕީއެންސީ ކޮންގްރެސްގައި ވާހަކަދައްކަވަމުން ދާހިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު އަލީ އިހްސާން ވަނީ ރާއްޖޭގައި އުޅޭ ބިދޭސީންގެ 95 އިންސައްތަ މިހާރު ބަޔޯމެޓްރިކްކޮށް ރެޖިސްޓްރީ ކުރެވިފައިވާކަން ހާމަކުރައްވާފައެވެ.

މި ސަރުކާރުން 13 ނޮވެމްބަރުގައި ވެރިކަމާ ހަވާލުވިިއިރު، 295,678 ބިދޭސީންނަށް ގާނޫނީގޮތުން އުޅުމުގެ ހުއްދަ ދީފައިވީ ނަމަވެސް، ފިންގަރޕްރިންޓާއި ފޮޓޯއާއެކު ރަސްމީ ސިސްޓަމްގައި ރެޖިސްޓްރީ ކުރެވިފައިވަނީ އެންމެ 22,700 މީހުންނެވެ. މީގެ ސަބަބުން ކަޅު ބާޒާރުގައި ފައިސާ ދައުރުވުމާއި، ގަވާއިދާ ހިލާފަށް ވިޔަފާރިކުރުން ވަނީ އިންތިހާއަށް އިތުރުވެފައެވެ. ނަމަވެސް، ފާއިތުވި 2.5 އަހަރު ތެރޭގައި ރައީސް ޑރ. މުޙައްމަދު މުޢިއްޒުގެ އިރުޝާދުގެ މަތިން ހޯމްލޭންޑް ސެކިއުރިޓީ މިނިސްޓްރީން ވަނީ މި އަދަދު 95 އިންސައްތައަށް މަތިކޮށްފައެވެ.

މި ނިޒާމުގެ ތެރެއިން ބާކީ ތިބި 5 އިންސައްތައިގެ ތެރެއިން 4 އިންސައްތަ މީހުން ރާއްޖެއިން ފުރައިގެން ގޮސްފައިވާއިރު، ބާކީ ތިބި 1 އިންސައްތަ ހޯދުމުގެ މަސައްކަތް މިހާރު ދަނީ ކުރިއަށެވެ. މުޅި ބިދޭސީ އާބާދީ އެކީ ސިސްޓަމްގެ ތެރެއަށް ވަނުމުން، ގަވާއިދާ ހިލާފަށް ބޭރަށް ފައިސާ ފޮނުވުން ހުއްޓުވައި، ވިޔަފާރިތަކުން ގަވާއިދަށް ހުރުމަތްތެރިކޮށް ހިތުމާއެކު، ދިވެހި އިގްތިސާދަށް އޭގެ ސަބަބުން އެދެވޭ ބޮޑު ބަދަލެއް އަންނާނެއެވެ.