ޕީއެންސީ ކޮންގްރެސްގައި ވާހަކަފުޅު ދައްކަވަމުން ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހްސާން ވިދާޅުވީ، މީގެ ކުރިން މަސްތުވާތަކެތީގެ މައްސަލަތައް ތަހުގީގު ކުރިއިރު ފުލުހުންގެ އެންމެ ބޮޑު ސަމާލުކަމެއް ދީފައިވަނީ މަގުމަތީގައި އުޅޭ ކުދި ޑީލަރުން އަތުން މަސްތުވާތަކެތި އަތުލައިގަތުމަށް ކަމަށެވެ. ނަމަވެސް އެފަދަ އުސޫލަކުން ކަންކަން ކުރުމުން، މުޅި ނެޓްވޯކްގެ އަޑީގައި ތިބޭ މީހުންނާ ހަމައަށް ނުފޯރާ ކަމަށް މިނިސްޓަރު ފާހަގަކުރެއްވިއެވެ.

މިނިސްޓަރު އިޙްސާން ވިދާޅުވީ، މަސްތުވާތަކެތީގެ ވިޔަފާރި ފަންޑުކުރާ މީހުންނާއި އޭގެ އެންމެ އިސްކޮށް ތިބޭ "ބޮޑުން" އާންމުކޮށް މަގުމައްޗަށް ނުކުމެ މަސްތުވާތަކެތި ނުވިއްކާ ކަމަށެވެ. އެހެންކަމުން މާޒީގައި ހިންގުނު ތަހުގީގުތަކުން ހައްޔަރުކުރެވިފައިވަނީ ހަމައެކަނި ކުދި ޑީލަރުން ކަމަށާއި، ނެޓްވޯކްތަކުގެ އެންމެ މަތީގައި ތިބި މީހުން ތިބީ އަތްނުފޯރާ ހިސާބުގައި ކަމަށް އިހްސާން ވިދާޅުވިއެވެ.

މި މައްސަލައަށް ދާއިމީ ހައްލެއް ހޯދުމުގެ ގޮތުން، ސަރުކާރުން މިހާރު ވަނީ ތަހުގީގީ ސިޔާސަތަށް ބޮޑެތި ބަދަލުތަކެއް ގެނެސްފައެވެ. މި ބަދަލުތަކުގެ ދަށުން މަސްތުވާތަކެތީގެ ވިޔަފާރިއަށް ފައިސާހަރަދުކުރާ މީހުންނާއި، އެ ނެޓްވޯކްތައް ހިންގާ އިސް ފަރާތްތަކަށް 25 އަހަރާ ހަމައަށް ޖަލު ހުކުމް އަންނާނެ ގޮތަށް އުސޫލުތައް ވަނީ ހަރުދަނާކޮށްފައެވެ.

އޭގެ އިތުރުން، ފުލުހުންގެ މިހާރުގެ އަމާޒަކީ ހަމައެކަނި މަސްތުވާތަކެތި އަތުލައިގަތުން ނޫން ކަމަށާއި، މިފަދަ ޖަރީމާތައް ހިންގައިގެން ހޯދާ މާލީ މަންފާތައް ބަންދުކޮށް، އެފަދަ ފަރާތްތަކުގެ ބާރުވެރިކަން ކަނޑުވާލުން ކަމަށްވެސް މިނިސްޓަރުގެ ވާހަކަފުޅުގައި ފާހަގަކުރެއްވިއެވެ.